Այսօր «Նոյյան Տապանի» մամուլի սրահում տաքսու վարորդները հանդես եկան պահանջով. այն էր՝ դադարեցնել տեսախցիկների կողմից արձանագրված տուգանքները, քանի դեռ իշխանությունների կողմից չի լուծվել նրանց կայանատեղի հարցը:
Ավտովարորդների պաշտպանության լիգայի իրավաբան Մկրտիչ Մուրադյանը, մեկնաբանելով տաքսու վարորդների պահանջը, ներկայացրեց մի շարք ակտեր, որոնք պատրաստվում են բողոքարկել, կապված՝ արագաչափերի, տեսախցիկների ֆիքսած նյութերի հետ: Մկրտիչ Մուրադյանի ներկայացմամբ՝ ֆիքսված խախտումները մեծամասամբ վերաբերվում են տաքսիների սխալ կայանմանը, ինչն էլ նա բացատրեց կայանատեղի չունենալու հանգամանքով, որը եւ վարորդների հիմնական մտահոգությունն է ու անհանգստությունը: Մկրտիչ Մուրադյանի փոխանցմամբ՝ ստեղծված իրավիճակի պարագայում՝ եթե առաջիկայում խնդրին լուծում չտրվի, ապա վարորդները բողոքի ցույցեր կկազմակերպեն.«Սրանից բացի, բավական բարձր են տուգանքների չափերը` համեմատած այսօրվա սոցիալ-տնտեսական պայմաններին: Նախկինում գոնե կային տաքսու համար հատուկ նախատեսված կայանատեղիներ: Այս առիթով դիմել ենք համապատասխան մարմիններին, բայց առ այսօր խնդրին լուծում չի տրվել: Նույնիսկ մամուլի միջոցով ենք դիմել , սակայն պատասխան չենք ստացել»:
Ավտովարորդների պաշտպանության լիգայի նախագահ Տիգրան Հովհաննիսյանն էլ ավելացրեց. որ առնվազն 300 կայանատեղի է պետք, իսկ առաջացած խնդրի վերաբերյալ՝ ըստ նրա, մինչ կառավարության կողմից համապատասխան որոշում չլինելը, առաջարկեց տուգանքներ չսահմանել, հակառակ դեպքում՝ « բողոքարկելու ենք»:
Եվա ՀԱԿՈԲՅԱՆ
