Այսօր ԱԺ նիստի սկզբում ՀԱԿ պատգամավոր Լեւոն Զուրաբյան առաջարկեց, որ պառլամենտում մեկ րոպե լռությամբ հարգեն Ուկրաինայում իշխանության կողմից մահաբեր զենքի կիրառման պատճառով տասնյակ զոհերի հիշատակը: Նա նկատեց, որ մահաբեր զենքի կիրառումը ցուցարաների դեմ իշխանության կողմից շատ վատ բան է`ակնարկելով նաեւ 2008-ի մարտի 1-ին Հայաստանում տեղի ունեցած իրադարձությունները:
ԱԺ նախագահը առաջարկեց հարգել ողբերգական իրադարձությունների բոլոր զոհերի հիշատակը, այդ թվում նաեւ՝ ոստիկանների, ովքեր նույնպես զոհվել են մահաբեր զենքի կիրառումից:
ԱԺ ՀՀԿ-ական պատգամավոր Մարգարիտ Եսայանն էլ իր խոսքում ողջունեց ԱԺ նախագահի լայնախոհությունը եւ նկատեց, որ այլ երկրներում տեղի ունեցող քաղաքական գործընթացները պետք չէ օգտագործել այստեղ`քաղաքական դիվիդենտներ շահելու համար: «Պետք չէ սիրուն դեմքով վատ բաներ անել»,- ասաց տիկին Եսայանը` հավելելով, որ, հարգելի պատգամավորը լավ կլիներ, որ նման առաջարկ աներ, երբ Սիրիայում մեր հայրենակիցներն էին զոհվում:
Ի դեպ, խորհրդարանն արտահերթ կարգով կքննարկի երկու հարց`քաղաքական մեծամասնության կողմից ներկայացրած «գազային ժամանակավոր հանձնաժողովի» հարցը եւ ՀԱԿ-ի ներկայացրած «մարտի մեկի» հարցով ԱԺ ժամանակավոր հանձնաժողով ստեղծելու հարցերը:
Կարդացեք նաև
Նելլի ԳՐԻԳՈՐՅԱՆ
