Այսօր տեղի ունեցավ «Մարդու իրավունքների եվրոպական կոնվենցիայի և Մարդու իրավունքների եվրոպական դատարանի նախադեպային իրավունքի կիրառման ամրապնդումը Հայաստանում» ծրագրի շնորհանդեսը:
Դանիայի Արտաքին գործերի նախարարության ստորաբաժանման ղեկավար Օլե Ռասմուսենը հույս հայտնեց, որ Դանիայի և ՀՀ կառավարությունները կկարողանան հասնել նրան, որ իրականում մարդկանց կյանքը բարելավվի: Նա մասնավորապես նշեց. «Ի դեմս ՀՀ-ի՝ մենք տեսնում ենք վստահելի գործընկեր: Ծրագրի նպատակը ոչ այնքան եվրոպական կոնվենցիայի կիրառումն է, այլ մարդկանց կյանքը բարելավելն է: Այս ծրագիրն առաջին անգամ է կիրառվում, այս անդամակցությունը ՀՀ-ի և Դանիայի ընդհանրության ապացույցն է մարդու իրավունքների և հիմնարար ազատությունների վերաբերյալ»:
Վճռաբեկ դատարանի քաղաքացիական և վարչական պալատի նախագահ Երվանդ Խունդկարյանն այս առիթով ասաց. «Ծրագրի նպատակն է ՀՀ-ում էլ ավելի ընդլայնել եվրոպական վճիռների կատարման շրջանակը, քանի որ մեր օրենսդրությամբ նախատեսված է եվրոպական դատարանի որոշումների կիրառումը ներպետական դատարանների համար»:
ՄԻԵԴ-ում Հայաստանը ներկայացնող դատավոր Ալվինա Գյուլումյանը եվրոպական դատարանի վճիռների նախադեպային կիրառման մասին նկատեց. «Վճիռներին երբեմն ՀՀ դատարաններում անդրադարձ կատարում են, բայց դրանք կտրված են լինում համատեքստից: Զուտ հղում կատարելը եվրոպական դատարանի վճռին՝ դեռ անհրաժեշտ չէ, պետք է, որ այդ հղումներից որոշակի հետևություններ կատարվեն: Կամ ինձ համար անհասկանալի է գործերից մեկում այն, որ մեր դատարաններից մեկը գտել է, որ եթե եվրադատարանը գտնում է, որ անձին կալանքի վերցնելը անպայման պետք է պայմանավորված լինի օրենքի դրույթով, ապա կալանքից ազատելը ևս պետք է պատճառաբանված լինի: Փաստորեն, դատարանն այստեղ ավելի նեգատիվ կիրառում է կատարել»:
Կարդացեք նաև
ՀՀ արդարադատության նախարար Հրայր Թովմասյանը ընդունելով, որ ոլորտում գոյություն ունեն խնդիրներ նշեց, ծրագրի շրջանակներում ստեղծված փորձագիտական խումբն ինչ օգտակարություն կարող է ունենալ.«Ձևավորվող խումբը ոչ միայն վերլուծելու է եվրոպական դատարանի վճիռները, որոնք վերաբերում են ՀՀ վճիռներին, այլ ցանկացած վճիռ, որը կարող է նախադեպային նշանակություն ունենալ: Մենք կանխարգելիչ գործառույթ ենք ակնկալում փորձագիտական խմբից և արդյունքում մենք ավելի քիչ գործեր կունենանք եվրոպական դատարանում»:
Տաթև ՀԱՐՈՒԹՅՈՒՆՅԱՆ
