Հինգշաբթի օրը ընդունած հայտարարությունում Եվրամիության խորհուրդը խորապես դատապարտում է բռնությունները Ուկրաինայում:
Եվրոպական միության խորհրդի հինգշաբթի օրվա որոշմամբ` Ուկրաինայում մարդու իրավունքների խախտման և բռնությունների համար պատասխանատուների մուտքը ԵՄ կարգելվի, և նրանց ակտիվները կսառեցվեն: Եվրամիության անդամ երկրները համաձայնել են կասեցնել այն սարքավորումների արտահանումը Եվրոպայից, որոնք կարող են օգտագործվել ներքին բռնաճնշումների նպատակով:
Եվրամիության խորհուրդը իր հայտարարության մեջ նշում է, որ ցնցված է և խորապես անհանգստացած Ուկրաինայում իրադրության վատթարացման կապակցությամբ:
«Ոչ մի հանգամանք չի կարող արդարացնել ստեղծված իրավիճակը: Եվրամիության խորհուրդը խորապես դատապարտում է բռնության գործադրումը: Նրանք, ովքեր պատասխանատու են մարդու իրավունքների ծանր խախտումների համար, պետք է կանգնեն արդարադատության առջև», – ասված է հայտարարությունում:
Կարդացեք նաև
«Մենք մտքով այն ընտանիքների հետ ենք, որոնք զոհեր և վիրավորներ ունեն: Ուկրաինայի իշխանություններին կոչ ենք անում անհապաղ դադարեցնել բռնությունը, հարգել մարդու հիմնարար իրավունքները, այդ թվում՝ բժշկական օգնություն ստանալու իրավունքը, և անմիջապես հետաքննություն սկսել բռնարարքներ գործածների դեմ», – հայտարարում է Եվրամիության խորհուրդը:
Էլինա Չիլինգարյան
Նյութի մանրամասները կարդացեք «Ազատություն» ռադիոկայանի կայքում
