Այսօր «Կոնգրես» հյուրանոցում տեղի ունեցավ խորհրդաժողով ՄԱԿ-ի Պարենի և գյուղատնտեսության կազմակերպության աշխատողների և ՀՀ գյուղատնտեսության նախարարության գլխավորությամբ: Միջոցառմանը նաև մասնակցում էին շուրջ 45 ներկայացուցիչներ գիտական կենտրոններից, տարբեր կազմակերպություններից, հ/կ-ներից, ինչպես նաև ֆերմերներ և այլ շահագրգիռ կողմեր:
Բացման խոսքով հանդես եկան ՀՀ գյուղատնտեսության փոխնախարար Գառնիկ Պետրոսյանը, ՊԳԿ-ի բուսաբուծության և բույսերի պաշտպանության հարցերով պատասխանատու Ավետիք Ներսիսյանը և Հայաստանում ՊԳԿ-ի ներկայացուցչի օգնական Գայանե Նասոյանը:
Նրանք ներկայացրեցին «Աջակցություն Հայաստանում բանջարային մշակաբույսերի սերմնաբուծության և սերմնարտադրության համակարգի զարգացումը» ծրագիր, որը ըստ Գ. Պետրոսյանի՝ զգալիորեն կխթանի բանջարաբուծության զարգացմանը՝ մասնավորապես բանջարային մշակաբույսերի սերմնաբուծության և սերմնարտադրության գործում:
Մասնակիցները քննարկեցին հանրապետությունում բանջարային մշակաբույսերի սերմնաբուծության և սերմնարտադրության համակարգի առկա վիճակը, վեր հանեցին համակարգի զարգացմանն առնչվող խնդիրներն ու խոչընդոտները և ներկայացրեցին իրենց դիտարկումները:
Կարդացեք նաև
Ա. Ներսիսյանը ներկայացրեց բուսաբուծության և բույսերի պաշտպանության ոլորտում ՊԳԿ-ճ գործունեությունը, մասնավորապես շեշտելով Հայաստանում սերմնարտադրության և մշակաբույսերի գենետիկ ռեսուրսների ուղղությամբ կատարվող աշխատանքները:
ՊԳԿ-ի միջազգային փորձագետ Ժան Լուի Դյուվալը համառոտ ներկայացրեց ծրագիրը, ռազմավարական մոտեցումները և հիմնական շահագրգիռ կողմերի մասնակցությունը ծրագրի իրականացման գործում: Նա ասաց. «Սույն ծրագրի իրականացումը պետք է ուղղված լինի դեպի շուկան՝ հիմնվելով վերջինիս պահանջարկի վրա և կառուցվի այնպես, որ կանոնակարգերը ծառայեն բանջարային մշակաբույսերի շուկայի զարգացմանը»:
Ծրագրի նպատակն է աջակցել երկրի ինստիտուցիոնալ կարողությունների հզորացմանը՝ նպաստելով բանջարեղենի արտադրության կայուն զարգացմանը՝ հիմնված տեղական գենետիկ ռեսուրսների վրա: Ծրագրի ընդհանուր բյուջեն կազմում է 459.000 ԱՄՆ դոլար:
Քրիստինե ԳՐԻԳՈՐՅԱՆ
