«Ուկրաինա պետության կազմալուծումն այլեւս նրա ներկան է»,- այսօր «Peoplemeter» ակումբում վերլուծելով Ուկրաինայում տեղի ունեցող իրադարձությունները, ասաց Կովկասի ինստիտուտի տնօրեն, քաղաքագետ Ալեքսանդր Իսկանդարյանը:
Քաղաքագետի մեկնաբանմամբ՝ երկրում այնպիսի իրավիճակ է ստեղծվել, որ ամեն ինչ անվերահսկելի է, ինչն էլ բերում է ճգնաժամի: Ալեքսանդր Իսկանդարյանը գտնում է, որ Ուկրաինայում փլուզվում է ամեն ինչ՝ մասնավորապես իշխանությունը:
«Ուկրաինան հերթական ճգնաժամն է ապրում: Թեեւ այնտեղ առաջին անգամը չէ, որ չի հաջողվում համաձայնության գալ, միավորվել: Ուկրաինական իրադարձությունները չնչին տարբերություններով նմանվում են Մերձավոր Արեւելքում ծավալվող իրադարձություններին: Ուկրաինացիները կամ միմյանց հետ պայմանավորվելու ձեւեր, տարբերակներ կգտնեն, կամ էլ՝ Ուկրաինան ֆորմալ կմնա»,- ավելացրեց Ալեքսանդր Իսկանդարյանը:
Ըստ նրա՝ մարդիկ արդեն չեն կարողանում նույնիսկ ոստիկանություն զանգահարել, բացարձակապես գոյություն չունի տեղական իշխանություն ու ժողովուրդն անգամ գրասենյակներից դուրս չի գալիս:
Կարդացեք նաև
«Ուկրաինայում բռնությունը սահման չունի: Նրա ներկան՝ կոլապսն է ու հիմա արդեն նշանակություն չունի, թե Յանուկովիչը ինչ իրավիճակում կհայտնվի, կհաղթի՞, կփախչի՞…»:
Ալեքսանդր Իսկանդարյանը համոզված է, որ եթե Ուկրաինան կարողանա համաձայնության գալ օլիգարխների, արեւմտյան կենտրոնների ներկայացուցիչների հետ, ապա իրավիճակը երկրում կփոխվի, իսկ հակառակ դեպքում՝ ամեն ինչ կշարունակվի ավելի վատ ձեւով:
Ալեքսանդր Իսկանդարյանը նաեւ հավելեց, որ Ուկրաինան այնպիսի երկիր է, որտեղ այս պահին տեղի ունեցող զարգացումներից շատ բան է կախված տարածաշրջանում:
Եվա ՀԱԿՈԲՅԱՆ
