«Այսօր իսկապես տոն է: Թումանյանը մեծ գրող և մեծ քաղաքացի է»,- ասաց Թումանյանի անվան տիկնիկային թատրոնի գեղարվեստական ղեկավար Ռուբեն Բաբայանը «Տեսակետ» մամուլի ակումբում լրագրողների հետ հանդիպման ժամանակ: Փետրվարի 19-ը Հովհաննես Թումանյանի ծննդյան օրն է, և այդ առիթով տիկնիկային թատրոնը բեմադրելու է Հովհ. Թումանյանի 6 ստեղծագործություն՝ «Անհաղթ աքլորը», «Սուտլիկ որսկանը», «Պոչատ աղվեսը», «Շունն ու կատուն», «Անխելք մարդը» և «Անբան Հուռին»:
«Թումանյանի անունը կրելը որոշակի պարտավորություն է դնում թատրոնի առջև. միշտ լինել ժամանակակից, միշտ առաջնորդվել նրա հումանիստական սկզբունքներով, որով ապրում և ստեղծագործում էր, պրոպագանդել Թումանյանին ամբողջ աշխարհում»,- ասաց պրն Բաբայանը: Սակայն նա նաև նշեց. «Մենք շատ քիչ ենք զբաղվում դրանով և կարող ենք արձանագրել, որ աշխարհը Թումանյանին չգիտի»:
Նա ասաց, որ «Անխելք մարդը» ստեղծագործությունը բեմադրել են աշխարհի մոտ 10 երկրներում՝ Հնդկաստանից մինչև Միացյալ նահանգներ: «Ամեն տեղ, որտեղ խաղում էինք այդ ներկայացումը, բոլորը նայում և ասում էին՝ «Սա մեր մասին է»: Թումանյանի բարձրացրած հայկական թեման համաշխարհային է, համամարդկային»,- ասաց թատրոնի գեղարվեստական ղեկավարը:
Մի դեպք պատմեց, որ տեղի է ունեցել թատրոնում, երբ գերմանացի հյուրերին ներկայացրել է Թումանյանի կյանքը և ստեղծագործությունները: Երբ պատմել է «Սուտլիկ որսկանը», գերմանացիները զարմացել են և հարցրել, թե երբ է գրվել այն: «Պատասխանը լսելուց հետո նրանք ասացին. «Թումանյանը եվրոպական աբսուրդ գրականության հիմնադիր է»: Թումանյանը բոլոր ժամանակների համար է»,- ասաց պրն Բաբայանը:
Կարդացեք նաև
Վարդուհի ԲԱԼՅԱՆ
