Վաչիկ Աղաջանի Ղարիբյանի քրեական գործի հետ կապված այսօր ասուլիս էին հրավիրել ՀՀ փաստաբանների պալատի անդամներ Ինեսա Պետրոսյանն ու Ամալյա Ավագյանը:
2002թ. «Սիգարոն» ՍՊԸ մոտ տեղի է ունեցել Արտավազդ Խանդանյանի և Պապին Վարդանյանի սպանությունը: Տասներկու տարի հետո ձերբակալվել է Վաչիկ Աղաջանի Ղարիբյանը: Վերջինս մեղադրվում է ՀՀ քրեական օրենսգրքի 38-104 երկրորդ մասի 1-ին և 7-րդ կետով:
Փաստաբան Ինեսա Պետրոսյանն ասաց, որ որդու նշանդրեքի հետ կապված Ռուսաստանում գտնվող Վաչիկ Ղարիբյանը եկել է Հայաստան, և «Զվարթնոց» օդանավակայանում անձնագրի գրառումների հետ կապված տարվել է ոստիկանության բաժին:Այնտեղ բացատրություն է վերցվում ու բաց թողնվում:
Անցյալ տարվա նոյեմբերի 21-ին, օդանավակայանից ոստիկանության բաժին տարվելու հաջորդ օրը, նա կրկին հրավիրվում է բաժին, ուր եւ ձերբակալվում է, կասկածանքով, թե տասներկու տարի առաջ օժանդակել է սպանության:
Կարդացեք նաև
Ըստ փաստաբան Ինեսա Պետրոսյանի, անհայտ անձանց կողմից կատարված այս սպանության գործում «անհայտությունները» շատ են, փաստարկներն էլ անհայտ:
Փաստաբաններն իրենց զարմանքը հայտնեցին այն հանգամանքի առնչությամբ, որ մարդուն կասկածում են սպանության օժանդակության համար, մինչդեռ, քննություն են տանում դատաձեռագրաբանական՝ կապված անձնագրային վավերացման հարցերի հետ:
Փաստաբան Ամալյա Ավագյանն էլ ասաց, թե իրենց պաշտպանյալը երեք ամիս է կալանքի մեջ է, նա չի խուսափել պատասխանել բոլոր հարցերին:
Ամալյա Ավագյանի տեղեկացմամբ, իրենք ինքնաբացարկի միջնորդություն են արել Կենտրոն և Նոր-Մարաշ վարչական շրջանների ընդհանուր իրավասության դատարանի դատավոր Էդիկ Ավետիսյանին, քանի որ նա եղել է սպանվածների կնքահայրը:
Սակայն ինքնաբացարկը մերժվել է, դատավորն ասել է, թե բոլորին էլ ճանաչում է՝ ավելի լավ :Ըստ պաշտպանների, վերաքննիչ քրեական դատարանը Գրիշա Մելիք-Սարգսյանի նախագահությամբ նույնպես հաշվի չի առել իրենց պաշտպանյալի անմեղությունը, եւ անփոփոխ է թողել կալանքի որոշումը:
Պաշտպանները դիմելու են վճռաբեկ դատարան:Մինչ այդ նրանք դիմել են գլխավոր դատախազին, որը պատասխանել էր, թե քննարկման մեջ է:
Մեղադրողը Երեւան քաղաքի դատախազությունից Ազատ Մարգարյանն է:
Aravot.am-ի հարցերին պատասխանելով՝ պաշտպանները տեղեկացրին, որ սպանությունից երեք տարի հետո իրենց պաշտպանյալը հեռացել է Հայաստանից, մինչ Հայաստանը գալը որեւէ հարց չի ծագել նրա սպանությանն առնչվելու հետ:
Ինչ վերաբերում է դատավորի հնարավոր վկա լինելու կարգավիճակի հստակեցմանը, պաշտպանական կողմն ասաց, որ այդ հարցի մասին իրենք չեն մտածել:
Այս գործով որեւէ քննչական գործողություն չի կատարվել ինսուլտ տարած, հիսունամյա կալանավորի հետ:
Երեկ պաշտպանները գնացել են արդարադատության նախարարության «Նուբարաշեն» քրեակատարողական հիմնարկ, որպեսզի ծանոթանան դատաձեռագրաբանական փորձաքննության եզրակացությանը, անձնագրի վավերացման, երկարացման գրառումի հետ կապված:
Ռուզան ՄԻՆԱՍՅԱՆ
