«Ազգային համաձայնություն» կուսակցության նախագահ Արամ Հարությունյանը, որը ուղիղ մեկ տարի առաջ տեղի ունեցած ՀՀ նախագահական ընտրություններում առաջադրել էր թեկնածությունը, եւ այսօր հետադարձ հայացք նետելով մեկ տարվա իրականությանը Aravot.am-ի հետ զրույցում հետեւյալն ասաց. «Իմ կանխատեսումներն իրականացան, ես առաջադրվել էի նաեւ այն առաքելությամբ, որ ներկայացնեմ, նկարագրեմ իրավիճակը,, նաեւ ցույց տալու, որ այս ընտրությունները ոչ մրցակցային են, որովհետեւ մինչ առաջադրվելը եղել էին ճնշումներ միասին 46 տոկոս ձայն հավաքած քաղաքական ուժերի նկատմամբ: Նկատի ունեմ ԲՀԿ, ՀԱԿ եւ ՀՅԴ կուսակցություններին եւ բնականաբար դա էր պատճառը, որ նրանք թեկնածու չունեցան այս նախագահական ընտրություններում, նկատի ունեմ օրինակ Վարդան Օսկանյանին մեղադրել փողերի լվացման մեջ, գաղտնալսումները, համակիրների վրա ճնշումները եւ այդ ամենը բերեց նրան, որ Սերժ Սարգսյանին հաջողվեց ստանալ ոչ մրցակցային ընտրություններ: Եւ այս ամենը բացահայտվեց հենց իմ շնորհիվ ու ես ընտրություններից տասը օր առաջ հանեցի իմ թեկնածությունը»:
Արամ Հարությունյանի խոսքով` խնդիրը ոչ միայն այն էր, որ ընտրությունները ոչ մրցակցային էին լինելու, այլեւ ինքը կանխատեսել էր նաեւ հետագա ընթացքը: Արամ Հարությունյանը կարեւորեց այն, որ ընտրություններում լեգիտիմություն ապահովելը չհաջողվեց ու Սերժ Սարգսյանի կարգախոսը`«հավատանք որ փոխենք»-ը չիրականացավ բոլոր ոլորտներում, դրան գումարած, Հայաստանը անարժանապատիվ ձեւով մտավ Մաքսային միություն: «Իշխանություններին չակերտավոր հաջողվեց բոլոր ոլորտներում ունենալ ձախողումներ ու այսօր ժողովրդի մոտ կա վստահության պակաս: Իշխանությունը Հայաստանի եւ ժողովրդի իշխանության հաշվին զբաղված է փող աշխատելով, որովհետեւ քաղաքացին ոչ միայն աշխատանք չունի, այլեւ հարձակումների է ենթարկում իշխանության կողմից, նրա ձեռքից բոլոր հնարավոր ձեւերով առնում են վաստակած չնչին գումարները…»,- ավելացրեց Արամ Հարությունյանը:
Եվա ՀԱԿՈԲՅԱՆ
Կարդացեք նաև
