«Հատուկ քննչական ծառայությունը և դատախազությունը դեմ են, որ իմ դեմ բռնություն կատարած անձինք ենթարկվեն պատասխանատվության: Այդ իսկ պատճառով մեր բազում բողոքները ՀՔԾ և գլխավոր դատախազություն մնացել են անպատասխան և մերժվել»,-Aravot.am-ի հարցին` ի՞նչ միտում է տեսնում այն փաստում, որ Գլխավոր դատախազությունը կբողոքարկի Արգիշտի Կիվիրյանի հայցը բավարարելու մասին դատարանի որոշումը, այսպես պատասխանեց Armenia Today կայքի համակարգող Արգիշտի Կիվիրյանը:
Հիշեցնենք, որ դատախազությունը, մասնավորապես, գործով դատավարական հսկողություն իրականացնող դատախազ Արթուր Երիցյանը Վերաքննիչ դատարան կբողոքարկի Արգիշտի Կիվիրյանի նկատմամբ բռնություններ գործադրած ոստիկանների նկատմամբ քրեական գործ չհարուցելու քննիչի որոշումը վերացնելու մասին առաջին ատյանի դատարանի ակտը:
Արգիշտի Կիվիրյանը գնահատական տալով՝ նշում է, որ «ամեն կերպ փորձում են կոծկել իմ դեմ բռնություն կատարած անձանց գործողությունները, հովանավորել նրանց»:
Մանրամասնելով՝ պարոն Կիվիրյանն ասաց. «Խոսքը ոստիկանության մասին է. դատախազությունը և ՀՔԾ-ն ամեն կերպ փորձում են հովանավորել ոստիկանությանը: Իրենք ամեն գնով պայքարում են, որ չհարուցեն քրեական գործ, իսկ եթե հարուցեն էլ, ապա այնպիսի նախաքննություն ընթանա, որ այդ գործերը չբացահայտվեն»:
Կարդացեք նաև
Հետաքրքրվեցինք` դրդապատճառները քաղաքակա՞ն են: Պարոն Կիվիրյանը պատասխանեց. «Դրդապատճառները քաղաքական են և իմ դեմ հալածանքների շղթայի շարունակությունը: Հիմնական մեղավորն այս ռեժիմն է, ՀՀ-ում իշխող քրեաօլիգարխիկ համակարգը, նրա պարագլուխը»:
Արգիշտի Կիվիրյանը վստահեցրեց, որ բոլոր օրինական ու հնարավոր միջոցներով պայքարելու է ու Վերաքննիչ դատարանում, ինչպես առաջին ատյանի դատարանում բոլոր փաստերով հիմնավորելու է ՀՔԾ-ի և Գլխավոր դատախազության գործողությունների ապօրինությունը:
Տաթև ՀԱՐՈՒԹՅՈՒՆՅԱՆ
