«Կարաս» գինիների պրոյեկտի պատասխանատու Վահե Քեուշգուերյանը այսօր «Ազդակ» մամուլի ակումբում ներկայացրեց Հայաստանում գինեգործության պոտենցիալը. «Հայաստանի գինեգործության զարգացման փուլն արդեն սկսված է: Հայաստանի բոլոր հայտնի գործարանները գինին արդեն պատրաստում են նոր տեխնոլոգիաներով»:
Պրն Քեուշգուերյանը վստահեցնում է, որ Հայաստանից մեծ քանակությամբ գինի է արտահանվում արտերկիր. «Գինու միայն մի փոքր մասն է մնում Հայաստանում: Մնացածը արտահանում ենք: Արտահանման ամենամեծ ծավալները Ռուսաստանում են, հետո Սովետական Միության մյուս երկրներում: Գինի է արտահանվում նաեւ եվրոպական եւ ամերիկյան այն տարածքները, որոնք ավելի շատ բնակեցված են հայերով: Մեզ համար, չնայած, ամենակարեւոր շուկան Ռուսաստանի շուկան է, մանավանդ ՄՄ մտնելուց հետո գինիների վաճառքը ավելի կհեշտանա այնտեղ»:
Նրա խոսքերով, արտերկրում մարդիկ արդեն աստիճանաբար սկսում են ծանոթանալ հայկական գինուն. «Շատերի մոտ տարածված է այն կարծիքը, որ հայերը խաղողից սարքում են միայն կոնյակ»:
Սակայն պրն Քեուշգուերյանը նշում է, որ Հայաստանում բավականաչափ խաղողի այգիներ չկան:«Մենք պետք է աշխատենք այն ուղղությամբ, որպեսզի մի քանի տարուց Արենու, Ղարաբաղի եւ Արտաշատի խաղողի այգիները տան առատ բերք: Պրն Քեուշգուերյանը նաեւ կարծում է, որ Հայաստանում մասնագիտացված գինեգործների պակաս կա. «Ես միայն մոտ 5 գործարան գիտեմ Հայաստանում, որտեղ բոլոր գինեգործները եկել են արտասահմանից՝ հիմնականում՝ Ֆրանսիայից, Արգենտինայից, Իտալիայից»:
Կարդացեք նաև
Խոսելով Հայաստանում գինեգործության հետ կապված խնդիրների մասին՝ պրն Քեուշգուերյանը նշեց, որ քանի որ Հայաստանում Ֆիլոքսերիա խաղողի հիվանդությունը այդքան տարածված չէ, որքան արտերկրում, ապա հիմնականում գինի պատրաստելիս օգտագործվում են հայկական խաղողի տեսակներ, սակայն դա էլ չի բավականացնում գինի պատրաստելու համար. «Իհարկե հնարավոր չէ միայն հայկական խաղողի տեսակներով գինի պատրաստել: Այդ իսկ պատճառով, օգտագործում ենք նաեւ արտասահմանից ներմուծված խաղող: Իսկ օրինակ, այն խաղողի տեսակները, որոնք աճում են միայն Հայաստանում, մարկետինգի տեսանկյունից մեզ համար շատ ձեռնտու են»:
Էլյա ՀՈՎՀԱՆՆԻՍՅԱՆ
