Գրիգոր Պապյանի սպանության գործով Սյունիքի մարզի ընդհանուր իրավասության դատարանում փետրվարի 24-28-ը կշարունակվի Գեւորգ, Կարապետ, Ջորջ, Հակոբ Թոսունյանների դեմ հարուցված քրեական գործի դատաքննությունը:
Ամբաստանյալների պաշտպան, ՀՀ փաստաբանների պալատի անդամ Վահագն Մանուկյանն Aravot.am-ին ասաց, որ բազմաթիվ միջնորդություններ են արվել, մասնավորապես, զինծառայող, իր պաշտպանյալ Ջորջ Թոսունյանին կալանքից ազատելու, այլընտրանքային խափանման միջոց կիրառելու՝ հրամանատարության տակ հանձնելու համար, սակայն դատարանն այն մերժել է, առանց պատճառաբանության:
Պաշտպանը տեղեկացրեց, որ մեղադրանքը պաշտպանող դատախազ Արման Հակոբյանի զեկուցագրի հիման վրա, ինչպես նաեւ Կապանի անձնագրային բաժնի պետի ասվածի վերաբերյալ Հատուկ քննչական ծառայությունում նախապատրաստվել են նյութեր, սակայն քրեական գործ չի հարուցվել պաշտոնատար անձանց գործողությունների կապակցությամբ, հանցակազմի բացակայության հիմքով:
Վահագն Մանուկյանը երեկ դիմել է Կենտրոն եւ Նորք-Մարաշ վարչական շրջանների ընդհանուր իրավասության դատարան՝ բողոքարկելով Հատուկ քննչական ծառայության որոշումը:
Կարդացեք նաև
Նշենք, որ այս գործով հետապնդում է իրականացվել Սյունիքի մարզի դատախազի նախկին տեղակալի, քննիչի, ոստիկանության բաժնի պետի տեղակալի, դատական բժիշկ-փորձագետի նկատմամբ, եւ գործը միացվել է , մեկ վարույթում, նույն դատավորի նախագահությամբ քննվում է:
Ռուզան ՄԻՆԱՍՅԱՆ
