Ավելի քան երկուսուկես ամիս է, ինչ Տավուշի մարզը դատախազ չունի: Մեր ունեցած տեղեկություններով Տավուշի դատախազությունում թափուր աշխատատեղերի պատճառով դատախազության աշխատակիցները աշխատում են ծանրաբեռնված: 2013թ. նոյեմբերի 28-ին իր դիմումի համաձայն աշխատանքից ազատվել է Տավուշի մարզի դատախազ Աննա Մանթաշյանը: Նա մեզ ասել է, որ հրաժարական է տալիս առողջական խնդիրների պատճառով. ինքը արյան բարձր ճնշում ունի: Սակայն նախկինում նա չէր գանգատվում առողջությունից եւ ծանրաբեռնվածությամբ աշխատում էր:
Դեռ մինչեւ 49-ամյա Աննա Մանթաշյանի հրաժարականը, նրա տեղակալ էին նշանակվել Ներսես Չիլինգարյանը, Արամ Դոլինյանը եւ Յուրա Բաղյանը: Վերջինս անցյալ տարվա նոյեմբերին Կոտայքի մարզից Տավուշի դատախազություն աշխատանքի էր տեղափոխվել: Նա այժմ ժամանակավորապես կատարում է Տավուշի մարզի դատախազի պարտականությունները:
Ոսկան ՍԱՐԳՍՅԱՆ
