Սկզբունքորեն, որոնք են Գագիկ Ծառուկյանի ելույթի հիմնական շեշտադրումներն ու մոտեցումները: Նրա ու ԲՀԿ-ի ելակետն այն է, որ երկրում իրականացվող տնտեսական եւ սոցիալական քաղաքականությունն անպտուղ է, կան բազում խնդիրներ, սկսած արտագաղթից ու աղքատության աստիճանից, վերջացրած հատկապես փոքր ու միջին տնտեսավարողների դժվարություններով:
Ի՞նչ են առաջարկում: Լայն ընդգրկմամբ, հետեւյալը. «Հավատացե՛ք, որ մենք կարող ենք միասին երկիրը հանել այս վիճակից: Շատ կարեւոր է հասկանալ, թե ինչ է պետք դրա համար: «Բարգավաճ Հայաստանը» հիմնական քաղաքական ուժերին, հասարակական ակտիվ շրջանակներին առաջարկում է կազմել հստակ քաղաքական-հասարակական-սոցիալական-տնտեսական միասնական օրակարգ եւ դրան հասնելու հստակ ճանապարհային քարտեզ»,- հայտարարեց Գ.Ծառուկյանը:
Չէի ասի, թե լավ թարգմանիչ եմ, բայց, այնուհանդերձ, փորձեմ «թարգմանել»: Սա, կարելի է ասել՝ «ազգային համաձայնության կառավարություն» կազմելու ակնարկ է:
Կոնկրետ խնդիրների կամ բնագավառների առումով էլ ԲՀԿ ղեկավարը մի քանի նշում արեց առ այն, թե ինչպես է պատկերացնում դրանց լուծումը կամ ինչ քայլեր է տեսնում:
Մասնավորապես նա համոզված է, որ պետք է, օրինակ, տաքսիստները, վարսավիրները, ատամնաբույժները, ընտանեկան բիզնեսը ունենան հարկային արտոնություններ եւ «ազատվեն ավելորդ քաշքշուկներից»: Հավանական համարեց փոքր բիզնեսի համար «հարկային արձակուրդ» հայտարարելը եւ ուղղակի «անիմաստ հարկերից ու իշխանության հետ գործ ունենալուց» ազատելը:
Կարդացեք նաև
Այնուհետ, ինչպես նախընտրական ծրագրում՝ բարենպաստ պայմաններ միջին բիզնեսին, տեղական արտադրության խթանում, լայն արտոնություններ սահմանամերձ գյուղերի բնակիչներին, օտարերկրյա նվազած ներդրումների ներգրավում եւ այսպես շարունակ, իսկ կենսաթոշակային պարտադիր կուտակային համակարգի ներդրումը պետք է կանգնեցնել:
Ավելին՝ Գագիկ Ծառուկյանը հայտարարեց, թե պատրաստ է ցանկացած ծախս անել, հրավիրել լավագույն տնտեսագետների, որ մեր երկրին տնտեսական «դեղամիջոցներ» առաջարկեն: Է՛լ ավելին, ԲՀԿ ղեկավարն ասաց, թե պատրաստ է շրջել երկրե-երկիր… Չէ, այս հատվածն ավելի լավ է ամբողջական մեջբերել. «Ես պատրաստ եմ ողջ աշխարհով մեկ առ մեկ հանդիպել աշխարհի տարբեր երկրներում ապրող մեծահարուստ ու հաջողակ մեր գործարար հայրենակիցներին, խնդրել, համոզել, որ Հայաստանում ներդրումներ անեն, գործ դնեն: Բայց ես գիտեմ, որ բոլորը ինձ տալու են նույն հարցը` իսկ արդյոք կա՞ն երաշխիքներ եւ համապատասխան պայմաններ: Ցավոք, այսօր ես չունեմ այդ հարցի պատասխանը»:
Ահա՛, կարծում ենք, այստեղ է նաեւ հանգույցը. տվեք ինձ հնարավորություն, երաշխիքներ, եւ ես կանեմ այս ու նաեւ այն: Դե, ինչո՞վ նախընտրական ելույթ չէ՝ ինքզինքը վարչապետի պաշտոնում տեսնող Գագիկ Ծառուկյանի համար, մանավանդ որ դրանից հետո նա անցավ իր արժանիքները նկարագրելուն:
Արմեն ՀԱԿՈԲՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
