2006 թվականից սկսած՝ Հայաստանից ուխտագնացություններ են կազմակերպվում Ավետյաց երկիր: Փետրվարի 2-13-ը Երուսաղեմ այցելած 45 հոգանոց ուխտավորների խումբը 65-րդն էր: Նրանց առաջնորդում էին Մայր աթոռ սուրբ Էջմիածնի տեղեկատվական համակարգի ղեկավար տեր Վահրամ քահանա Մելիքյանը եւ Զորավոր սուրբ Աստվածածին եկեղեցու հոգեւոր սպասավոր տեր Զենոն քահանա Բարսեղյանը: Ուխտավորներից ամենատարեցը 81-ամյա Սոնյա մայրիկն էր` Սպիտակից, կրտսերը՝ 1,5-ամյա Անգելինա-Մարիան, որը մկրտվեց Երուսաղեմում: Սոնյա մայրիկն ասում է՝ երկրաշարժ է տեսել, կորցրել որդուն, պահել-մեծացրել նրա զավակներին, սակայն, չնայած դժվարություններին, չի կորցրել հավատն ու լավատեսությունը:
Ամենափոքր ու ամենատարեց ուխտավորները:
Կարդացեք նաև
Պատմիչների փաստմամբ, հայոց եկեղեցին Ավետյաց երկրում ժամանակին ունեցել է շուրջ 70 վանք եւ եկեղեցի, այսօր դրանց թիվը 12-ն է:
«Առավոտի» հետ զրույցում տեր Վահրամը կարեւորում է հայաստանցի ուխտավորների այցերը սուրբ երկիր. «2006 թվականից դեպի տերունակոխ վայրեր ուխտագնացությունները կարեւոր են հայ հավատացյալի համար՝ տիրոջ երկրային կյանքի տարբեր հանգրվաններին հաղորդակից լինելու, այդ ամենով ապրելու ու զորանալու, վերափոխվելու առումով»: Նրա ձեւակերպմամբ. «Հպարտությամբ է լցնում հոգիդ այն իրողությունը, որ հայոց եկեղեցին լայն իրավունքներ ունի համաքրիստոնեական սրբավայրերում, մեծագույն այդ սրբավայրերը հայ եկեղեցին է կիսում եւ իբրեւ իրավատեր, եւ տնօրինում է դրանք՝ հույն եւ կաթոլիկ եկեղեցիների հետ մեկտեղ»:
Սուրբ Հարության տաճար
Եռագույնը՝ Գալիլիայի ծովակի վրա:
Տեր Վահրամի նման տեր Զենոնն էլ էր առաջին անգամ այցելում Երուսաղեմ: «Վստահություն ունեմ, որ տերունակոխ վայրեր այցելած ուխտավորների հոգիները հավատով են լցվում, վերազարթոնք ապրելով որպես քրիստոնյաներ` նրանք վերադառնալու են իրենց հայրենիքը, ոչ միայն քրիստոնյա անունը կրելով, այլեւ քրիստոնեությունը որպես կենցաղավարություն, ապրելու միջոց դարձնելով` կյանքը շարունակելու են մայր հայրենիքում»,- ասում է քահանան: Տեր Զենոնն անչափ տպավորված է. «Ես ինքս էլ առաջին անգամ լինելով տերունակոխ վայրերում՝ հոգու կանչի, հուզմունքի, ապրումներ ունեցա՝ որպես հոգեւորական, պատարագներ մատուցելով տիրոջ գերեզմանի վրա, տիրոջ մսուրում…»:
Տեր Վահրամ եւ տեր Զենոն քահանաները:
Հայր Թեոդորոսը:
Ուխտավորների թվում էր Հայոց եկեղեցու պատմության ուսուցչուհի Անժելա Բարսեղյանը: Նա երկրորդ անգամ է ոտք դնում Ավետյաց երկիր: Կարծում է, որ յուրաքանչյուր ընտանիքից մեկը պետք է կյանքում գոնե մեկ անգամ գա քրիստոնեական գլխավոր սրբավայրերը:
Ուխտավորները, ի թիվս այլ սրբավայրերի, այցելեցին նաեւ Սրբոց Հակոբեանց մայրավանք, սուրբ Հարության տաճար, Սիոն լեռան եւ Գալիլիայի ծովակի սրբավայրեր, Գեթսեմանի պարտեզ, «Հայր մեր» եկեղեցի, սուրբ Նիկողայոսի Հայոց վանք, Երանիների լեռան եկեղեցի եւ այլն: Մասնակցեցին Թափորի՝ Հարության տաճարում ու պատարագների: Ուխտավորներին սիրով ուղեկցում ու սուրբ վայրերում հայոց հզոր ներկայության մասին տեղեկությունների էին հաղորդում Երուսաղեմի Ժառանգավորաց վարժարանի եւ Ընծայարանի տեսուչ հայր Թեոդորոս վարդապետ Զաքարյանը, Անդրանիկ, Կարապետ եւ Ալբերտ սարկավագները:
ԳՈՀԱՐ ՀԱԿՈԲՅԱՆ
Երուսաղեմ-Երեւան
