Հատված պաշտպանության նախարար Սեյրան Օհանյանի հարցազրույցից:
– Կռված ազատամարտիկների կողմից շատ են ԵԿՄ ղեկավարության նկատմամբ եղած դժգոհությունները: Նրանք դժգոհ են, որ Մ. Գրիգորյանն ու մի խումբ այլ կռվածներ՝ իշխանություններին մոտ գտնվելու շնորհիվ հարստանում են, իսկ մյուսները օրվա հացի խնդիր ունեն:
– Գիտեք, ես դա չեմ նկատում և դրա մեջ չեմ խորանում, որովհետև իմ վերաբերմունքը իմ մարտական ընկերների նկատմամբ՝ լինի նա երկրապահ, թե ազատամարտիկ կամ վետերան, նույնն է: Ի վերջո, ԼՂՀ պատերազմից հետո շատ կազմակերպություններ են բացվել, որոնք զբաղվում են պատերազմի արդյունքում առաջացած խնդիրներով, և նրանք բոլորն էլ ինձ համար հավասար են, ես բոլորի հետ էլ համագործակցում եմ: Բայց չեմ բացառում, որ ինչպես բոլորի մոտ, այնպես էլ այս դաշտում կլինեն թերություններ, և դրանք նկատելու դեպքում ասում ենք, որ պետք է վերացնել: Կարծում եմ, որ վերջին տարիներին երկրապահների՝ որպես հասարակական կազմակերպության, աշխատանքն ավելի հստակ է դարձել և կատարելագործվում է:
– Այնուամենայնիվ, վերջին շրջանում մեծ են իշխանությունների նկատմամբ կռված տղաների դժգոհությունները: Նրանց առանձին խմբեր բողոքի ակցիաներ են անում, Սասուն Միքայելյանն է ուզում առանձին միավորում ստեղծել, արդեն կան նոր ձևավորված այլ շարժումներ:
Կարդացեք նաև
– Կարծում եմ` այսօրվա իրականությունից չենք կարող զերծ մնալ, և դժգոհություն է առաջացնում շատ-շատերի, ոչ միայն երկրապահների մոտ:
– Մեծ է դժգոհությունը հատկապես այն առումով, որ որոշ կռված մարդիկ կամ բանակի պաշտոնյաներ շատ ավելի մեծ կարողություններ ունեն:
– Դուք ի՞նչ եք կարծում` կռված տղաները, որոնք որ ապահովել են այսօրվա խաղաղությունը, մեր պետության զարգացումը, կռվել են այս երկրի համար, չպե՞տք է ինչ-որ հնարավորություններ ունենան իրենց անձնական խնդիրները լուծելու համար, հատկապես, որ շուկայական հարաբերություններ են: Դե գնացեք ու այդ հարցերը տվեք շատ օլիգարխների:
– Բանակի որոշ պաշտոնյաներ ու կռված տղաներ գրեթե օլիգարխ են դարձել:
– Չեմ տեսնում, բանակում այսօր օլիգարխ չկա: Եթե մատով ցույց տաք, և նա հարստություններ ունի, ես կասեմ, որ պարտվեցի:
– Յուրի Խաչատուրով, Հայկազ Բաղմանյան, Արշալույս Փայտյան, ով վերջերս ազատվեց կոռուպցիոն երևույթներին ներգրավված լինելու պատճառով: Բազմաթիվ հրապարակումներ են եղել, որ այս ու այլ պաշտոնյաներ հասցրել են բանակի հաշվին հարստություն կուտակել:
– Չունեն նրանք այն հնարավորությունները, որ ունեն մնացած օլիգարխները:
– Պարոն Օհանյան, անընդհատ ավելացող արտագաղթն ինչպե՞ս է անդրադառնում բանակի վրա, չէ՞ որ շատ երիտասարդներ են լքում Հայաստանը: Արդյունքում չի՞ կրճատվում բանակ զորակոչվող երիտասարդների քանակը:
– 2013թ. գարնանային զորակոչի պլանը կատարել ենք 111 տոկոսով, իսկ աշնանային զորակոչը, որը տեղափոխվեց 2014թ. ձմեռ, կատարել ենք 106 տոկոսով: Զորակոչի իրականացման աշխատանքների մեջ ավելի կազմակերպված լինելու, արդարության մակարդակը բարձրացնելու, ավելի հետևողական լինելու արդյունքում բանակի համալրվածությունն այսօր ապահովված է: Դա ապահովում ենք նաև պրոֆեսիոնալ՝ պայմանագրային զինծառայողների քանակը օրըստօրե ավելացնելով:
Արմինե ԱՎԵՏՅԱՆ
Հարցազրույցն ամբողջությամբ «Ժամանակ» թերթի այսօրվա համարում
