Մի քանի տասնյակ գիտնականներ, գրողներ բաց նամակով դիմել են Շվեյցարիայի կառավարությանը՝ կոչ անելով բողոքարկել Մարդու իրավունքների եվրոպական դատարանի Դողու Փերինչեքի Շվեյցարիայի դեմ գործի որոշումը, ըստ որի՝ Հայոց ցեղասպանությունը հերքելու համար պատասխանատվության չեն ենթարկվում: Հայտնում է «Արմենիան Ուիքլի» թերթը:
Մտավորականները ՄԻԵԴ-ի որոշումն անվանել են «պատմական և մոտեցման անճշտություն» և նշել, որ անպայման պետք է վերանայվի այդ վճիռը:
Շվեյցարիայի արդարադատության նախարար Սիմոնետա Սամարուգային հասցեագրված նամակում նրանք նշել են, որ ՄԻԵԴ-ը, հղում անելով Եվրոպական կոնվենցիայի 17-րդ (իրավունքների խախտման արգելում) հոդվածին, ընդգծել է, թե «1915թ. իրադարձությունները, «ցեղասպանություն» իրավական բնորոշումը մերժելը հայ ժողովրդի դեմ ատելության քարոզ չէ», մինչդեռ մեկ այլ տեղ ՄԻԵԴ-ը սահմանում է, որ «Հոլոքոստի ժխտումն այսօր հակասեմականության գլխավոր շարժիչն է»:
Թուրքական «Աշխատավորական» կուսակցության նախագահ Դողու Փերինչեքը Շվեյցարիայում հայտարարել էր, որ Հայոց ցեղասպանությունը «միջազգային հանրության տարածած կեղծիքներն են», ինչի համար Շվեյցարիայի դատարանը նրան մեղավոր ճանաչեց ռասիզմի մեջ: Սակայն Փերինչեքը գործը տեղափոխեց ՄԻԵԴ, որտեղ անցած տարվա դեկտեմբերի 17-ի որոշմամբ ընդունվեց, որ այդ արտահայտությունները համապատասխանում են խոսքի ազատության իրավունքին:
Կարդացեք նաև
Պատրաստեց Հովհաննես ԻՇԽԱՆՅԱՆԸ
