Այսօր «Հայելի» ակումբում ՀՀԿ պատգամավոր Վարդան Այվազյանի ու ԲՀԿ պատգամավոր Լյովա Խաչատրյանի միջև թեժ բանավեճ ծավալվեց Պարտադիր կուտակային կենսաթոշակային համակարգի մասին: ԲՀԿ անդամն ասաց, թե՝ «Ձեր գումարը գողին կվստահե՞ք: Իմ դիրքորոշումն այն է, որ մի կառավարության, որի մասին Վերահսկիչ պալատն ասում է, թե բյուջեի 70 տոկոսը գողանում է, ՄԻՊ-ը ասում է, թե պրեսկուրանտով են աշխատում, կվստահե՞ք: Կամ աշխատավարձը պիտի բարձրանար, չբարձրացավ, տնտեսական աճ երկու անգամ պակաս ունեցանք»:
Ի պատասխան ՀՀԿ պատգամավոր Վարդան Այվազյանն ասաց. «Երբ առաջին անգամ օրենքը ընդունվում էր, ԲՀԿ-ն կողմ էր այդ գաղափարախոսությանը, այդ ի՞նչ եղավ»:
Լյովա Խաչատրյանն ասաց, թե պետք է լսել, թե ինչ է ասում Վարդան Այվազյանն ու հասկանալ հակառակը: Այնուհետև առաջարկեց մի «էքսպերիմենտ» անել և առաջիկա տոներին հարակից հրապարակներում ՀՀԿ-ն ու ԲՀԿ-ն իր համախոհներին հավաքի ու տեսնի, թե ով ավելի շատ համախոհներ կհավաքի: Վարդան Այվազյանն ասաց. «Այվազյան Վարդանին չկասկածեք»: Ի պատասխան Լյովա Խաչատրյանն ասաց. «Քեզ անձնապես չեմ ասում, քո կուսակցությանն եմ ասում»:Ի պատասխան Վարդան Այվազյանն ասաց. «Իմ կուսակցությունը Այվազյան Վարդանից ու մյուսներից է կախված»:
ԵԿՄ համագումարում հարցուպատասխանի ժամանակ Սերժ Սարգսյանի այն հայտարարության՝ թե «մենք հո ախմախ չենք, որ ռեսուրս ծախսենք մի համակարգի վրա, որ արդյունք չի տալիս» առիթով հարցին, թե՝ «Սերժ Սարգսյանը ախմա՞խ է, թե ոչ», պարոն Խաչատրյանն այս հորդորով արձագանքեց. «Եկեք կոռեկտության սահմանները չանցնենք»:
Իսկ դիտարկմանը, թե Գագիկ Ծառուկյանը կենսաթոշակային համակարգն անմարդկային է համարել, պարոն Խաչատրյանն այս կապակցությամբ ասաց. «Ես չեմ վստահում այս կառավարությանը և խորհուրդ եմ տալիս Ձեր փողերը չվստահել այդ կառավարությանը»:
Տաթև ՀԱՐՈՒԹՅՈՒՆՅԱՆ
Ինչպես ասում էր Ժիգլովը. “Եթե մարդը գող է, նա պետք է նստի բանտում”: Խոսքերն ավելորդ են…