ԱԺ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի նախագահ Արտակ Դավթյանին տարբեր ստեղծագործական միությունների անդամներ այնքան են դիմել իրենց հասարակական կազմակերպության անվան մեջ «ստեղծագործական միություն» արտահայտությունը գրելու իրավունք ստանալու վերաբերյալ, որ նա օրենսդրական նախաձեռնությամբ է հանդես եկել, որով «Հասարակական կազմակերպությունների մասին» օրենքում փոփոխություն է առաջարկում. «Այլեւս չի կարողանում այդ մարդկանց աչքերին նայել»:
Այս օրենքով չի թույլատրվում «միություն» բառն օգտագործել հ/կ-ի անվանման մեջ: Իսկ պարոն Դավթյանի օրինագծով նախատեսվում էր հետեւյալը. «Եթե միավորումը 50 եւ ավելի տարի ՀՀ օրենսդրությամբ սահմանված հիմքերով գործում է որպես ստեղծագործական միություն, կարող է պետական գրանցում ստանալ՝ պահպանելով «ստեղծագործական միություն» անվանումը եւ իրավահաջորդությունը»:
Այսօր մարդու իրավունքների պաշտպանության եւ հանրային հարցերի մշտական հանձնաժողովում, օրինագիծը քննարկելու արդյունքում հանձնաժողովականները եկան այն եզրակացության, որ կարեւոր չի 50 տարվա, թե երեք տարվա կազմակերպություն է, միություն բառը պետք է թույլ տալ: Մասնավորապես, պատգամավոր Ալեքսանդր Արզումանյանը դեմ էր ստեղծագործական միություններին մյուս հ/կ-ներից՝ «վաստակաշատության» հիման վրա առանձնացնելուն: Նա նկատեց, որ այսօր կան երեք տարվա հ/կ-ներ, որոնք շատ ավելի բան են արել մեր հասարակության համար, քան մատնագրերով գրողներին Սիբիր ուղարկող, Չարենցի եւ Մահարու «գլուխները կերած» Գրողների միությունը: Նա առաջարկեց ընդհանրապես թույլատրելի համարել «միություն» բառի օգտագործումը՝ հ/կ-ի անվան մեջ, օրինակ՝ «Գարեջուր սիրողների միություն», եւ որեւէ շեշտադրում չանել կազմակերպության վաստակի, իրավահաջորդության եւ այլնի վրա:
Օրինագծի հեղինակն ընդունեց այդ առաջարկները, եւ հանձնաժողովը դրական եզրակացություն տվեց այս օրինագիծը՝ որոշակի փոփոխություններով ԱԺ մեծ օրակարգ մտցնելուն:
Մելանյա ԲԱՐՍԵՂՅԱՆ
