Այսօր Գյումրու «Մայր Հայաստան» հուշահամալիրի տարածքում նշվեց Գյումրու ձմեռն ու Սուրբ Սարգիսի տոնը: Ի տարբերություն նախորդ տարվա, երբ ջանք-եռանդ չէր խնայվել այս նույն տոնը հրաշալի բեմադրություններով, տարբեր տեսակի մշակութային միջոցառումներով նշելու համար, քանի որ Հայաստանում նախագահական ընտրություններ էին, և Շիրակի մարզի վերնախավը պատրաստվում էր հյուրընկալել ՀՀԿ-ական թեկնածու Սերժ Սարգսյանին, այսօր այն անկազմակերպ էր, տխուր: Զգալի էր, որ գրեթե գումար չկար ծախսված այս միջոցառման համար: Եվ եթե չլինեին Սուրբ Սարգիսի երեք ձիավորները, միգուցե և հայտնի չդառնար, որ Գյումրիում տոն են նշում:
Նկատենք, որ միջոցառմանը չէին մասնակցում ոչ քաղաքապետ Սամվել Բալասանյանը, ոչ մարզպետ Ֆելիքս Ցոլակյանը և ոչ էլ Շիրակի մարզի ՀՀԿ կառույցի ղեկավար Սահակ Մինասյանը: Մինչդեռ անցած տարի այս նույն պաշտոնյան այնպես էր կազմակերպել Սուրբ Սարգսի տոնը, որ թվում էր, թե Գյումրիում չես, այլ կախարդական տեսարաններով բացիկի մեջ: Այս փաստը չվրիպեց միջոցառմանը մասնակցող լրատվամիջոցների ներկայացուցիչների աչքից, ովքեր այս տարվա միջոցառումը համեմատելով նախորդ տարվա հետ, կատակով ասացին. «Ականջդ կանչե Սերժ Սարգսյան, ո՞ւր ես, չգիտե՞ս, որ մեր մարզում Սուրբ Սարգիսին անգամ միայն քո պատվին են հիշում ու դիմավորում»:
Նունե ԱՐԵՎՇԱՏՅԱՆ
