Այս պահին ՀԱԿ համախոհները Մաշտոցի պողոտայում մարտի 1-ի ՀԱԿ հանրահավաքի մասին են իրազեկում: Իրավապաշտպան, ՀԱԿ անդամ Վարդգես Գասպարին անցորդներին տեղեկացնում է, որ նախօրեին հենց այս պողոտայում են ՀԱԿ ակտիվիստները բռնությունների ենթարկվել:
Նա դատապարտում է նաեւ ոստիկանական բաժանմունքում լրագրող Անի Գեւորգյանին ապտակող ոստիկանի քայլը. «Բոլորս խստագույնս դատապարտում ենք լրագրողների նկատմամբ բռնությունները: Այս ակցիայով հայտարարում ենք այն իրավունքը, որը խոչընդոտել են իշխանության շրջանակների խուլիգան անձինք»:
Lragir.am կայքի լրագրող Թեհմինե Ենոքյանն էլ պատմեց, որ ՀԱԿ ակտիվիստների հետ միջադեպ ունեցած երիտասարդներին՝ ՀՀԿ երիտթեւի եւ Ագրարային համալսարանի ուսխորհրդի անդամներին, ինքն է առաջինը բացահայտել, ինքնությունը պարզելուց հետո՝ նրանց նկարները տարածել Ֆեյսբուքում, իսկ հենց հաջորդ առավոտյան 10-15 սպառնալիք պարունակող նամակներ է ստացել՝ այդ ֆոտոները վերացնելու պահանջով: Նրա խոսքով՝ սկզբում խնդրանքի, հետո հայհոյախառն սպառնալիքների ձեւով սպառնացել են Ֆեյսբուքից չհանելու դեպքում Անժելա Սարգսյանի նկարների նման սարքել եւ տարածել նրա անձնական նկարները, սպառնացել են նաեւ վնասել ընտանիքի անդամներին:
Կարդացեք նաև
Թեհմինեն ասաց, որ դիմելու է Մարդու իրավունքների պաշտպանի գրասենյակ, իսկ ՀՀԿ-ականների նկարները չի պատրաստվում հանել Ֆեյսբուքից:
Ակցիան մոտենում է ավարտին:
Արփինե ՍԻՄՈՆՅԱՆ
