ՀՀ փոխվարչապետ, տարածքային կառավարման նախարար Արմեն Գեւորգյանի մոտ այսօր կայացած խորհրդակցության ընթացքում քննարկվեցին մարզային այցելությունների ժամանակ բարձրացված` առողջապահական հաստատությունների խնդիրներին վերաբերող մի շարք հարցեր: Խորհրդակցությանը մասնակցում էր նաեւ ՀՀ առողջապահության նախարար Դերենիկ Դումանյանը:
Խորհրդակցության օրակարգում էր մարզային առողջապահական հաստատությունների իրավական կարգավիճակի փոփոխության հարցը: Նշվեց, որ համայնքներում մի շարք հաստատություններ գործում են որպես ՓԲԸ-ներ, սակայն հաշվի առնելով վերջիններիս գործունեության բնույթը, այդ հաստատությունների համար առավել նպատակահարմար է ոչ առեւտրային կազմակերպությունների կարգավիճակը: Պայմանավորվածություն ձեռք բերվեց, որ Առողջապահության եւ Տարածքային կառավարման նախարարությունների, ինչպես նաեւ շահագրգիռ այլ կողմերի ներկայացուցիչների մասնակցությամբ կստեղծվի աշխատանքային խումբ` իրավական կարգավիճակի փոփոխության գործընթացն իրականացնելու համար:
Խորհրդակցությանը քննարկվեցին նաեւ առողջապահական հաստատությունների 2014թ. ֆինանսավորմանն ու գործունեության արդյունավետ կազմակերպմանը վերաբերող հարցեր: Նշվեց, որ այս հարցերի շուրջ Առողջապահության նախարարությունում մեկ անգամ արդեն քննարկում եղել է մարզային պատասխանատուների մասնակցությամբ, սակայն վերջնական մոտեցում չի ձեւավորվել, եւ լրացուցիչ քննարկման անհրաժեշտություն կա: Որոշվեց, որ մինչեւ առաջին եռամսյակի ավարտը կառավարություն կներկայացվեն առաջարկություններ` համապատասխան պայմանագրային պարտավորությունների համար հիմք հանդիսացող ելակետային տվյալների ճշգրտման մասին: Փոխվարչապետը հորդորեց, որպեսզի Առողջապահության նախարարությունը մարզպետարանների հետ համատեղ սեղմ ժամկետներում ավարտի անհրաժեշտ պայմանագրերի կնքման գործընթացը` ֆինանսավորում ապահովելու համար:
Մարզերում բարձրացված մյուս հարցը վերաբերել է մարզերից Երեւանի բուժհաստատություններ հիվանդների ուղեգրման գործընթացին: Պայմանավորվածություն ձեռք բերվեց, որ Առողջապահության նախարարությունում կուսումնասիրվեն 2013թ. մարզպետների կողմից ներկայացված միջնորդությունները` հիվանդների թվաքանակի եւ հիվանդությունների ցանկի վերաբերյալ, եւ դրանց հիման վրա կմշակվեն հստակ ընթացակարգեր: Անհրաժեշտության դեպքում` մարզերի համար կարող են կիրառվել որոշակի չափաքանակներ` ըստ բնակչության թվի:
Անդրադարձ եղավ նաեւ Առողջապահության նախարարության կողմից մշակված` Գեղարքունիքի եւ Արագածոտնի մարզերի մի շարք առողջապահական հաստատությունների օպտիմալացման նախագծին: Որոշվեց, որ դրանք եւս մեկ անգամ կքննարկվեն մարզերում:
Կարդացեք նաև
Խորհրդակցությանը քննարկվեցին նաեւ մի շարք համայնքներում կոնկրետ հաստատությունների գործունեությանը վերաբերող հարցեր:
Տարածքային կառավարման նախարարության հասարակայնության հետ կապերի բաժին
