Փետրվարի 12-ին ՀՀ ԱԺ նախագահ Հովիկ Աբրահամյանը ԱԺ պաշտպանության, ազգային անվտանգության եւ ներքին գործերի մշտական հանձնաժողովի անդամների, Տավուշի մարզպետի եւ այլ պաշտոնատար անձանց ուղեկցությամբ աշխատանքային այցով Տավուշի մարզում էր:
ԱԺ նախագահի գլխավորած պատվիրակության առաջին կանգառը Տավուշի մարզի զորամասերից մեկն էր: ԱԺ նախագահին զինվորները դիմավորեցին առանձնահատուկ ոգեւորությամբ՝ ՀՀ օրհներգի հնչյունների ներքո: Դիմելով հրամանատարական եւ սպայական անձնակազմին ու զինվորներին՝ ԱԺ նախագահ Հովիկ Աբրահամյանը նշեց, որ այցի նպատակն է ծանոթանալ զինվորների խնդիրներին՝ համոզմունք հայտնելով, որ այսօր, քան երբեւէ, բարձր հիմքերի վրա է գտնվում Ազգային ժողով-ՀՀ պաշտպանության նախարարություն համագործակցությունը: Պարոն Աբրահամյանը նշեց, որ ՀՀ Նախագահը, Ազգային ժողովը եւ կառավարությունը կարեւորում ու մշտապես ուշադրության կենտրոնում են պահում սահմանապահ զինվորների խնդիրները ու պարբերական այցերի միջոցով փորձում են աջակցել խնդիրների լուծմանը: Անդրադառնալով Ադրբեջանի իշխանությունների գործողություններին՝ նա ընդգծեց, որ մեր զինվորների կողմից համապատասխան հակահարված տրվում է: «Մենք, ի հակառակ Ադրբեջանի իշխանությունների, քարոզում ենք, որ մեր առջեւ դրված խնդիրները պետք է լուծենք խաղաղ բանակցությունների արդյունքում, սակայն դա չի լինում միակողմանի: Ինչեւէ, Ադրբեջանի իշխանությունները դեռեւս ողջամիտ քաղաքականություն չեն դրսեւորում: Իհարկե, մենք ցանկանում ենք խաղաղություն, բայց եթե մեզ պարտադրեն պատերազմ, մենք կտանք արժանի հակահարված եւ կպաշտպանենք մեր հայրենիքը, մեր հողը, մեր ջուրը»,- ասաց օրենսդրի ղեկավարը: Նա ընդգծեց, որ ՀՀ իշխանությունները ՀՀ Նախագահի գլխավորությամբ հայոց բանակի կողքին են: Խորհրդարանի նախագահը խաղաղ եւ անվտանգ ծառայություն մաղթեց զինվորներին:
Զինվորական նվագախմբի ուղեկցությամբ տեղի ունեցավ հանդիսավոր հաղթական քայլերթ, որից հետո ԱԺ նախագահը շրջեց զորամասում, ծանոթացավ զինվորների առօրյային ու խնդիրներին:
Այնուհետեւ ԱԺ նախագահը բարձրացավ սահմանապահ դիրքեր, թեյի սեղանի շուրջ զրուցեց սպայական անձնակազմի ու զինվորների հետ: Նա շրջեց անձնակազմի կացարաններում, ծանոթացավ պայմաններին եւ խոստացավ բարձրացված խնդիրներին լուծումներ տալ:
Կարդացեք նաև
Նշենք, որ Ազգային ժողովի նախագահը ձեռնունայն չէր գնացել զորամաս ու սահմանային հենակետ. տրվեց այլընտրանքային հոսանքի աղբյուր հանդիսացող սարքեր, հեռուստացույց, DVD նվագարկիչ եւ այլն:
ԱԺ նախագահի հաջորդ կանգառը Բերքաբեր համայնքն էր, որտեղ նա այցելեց վերակառուցված դպրոց եւ տեղում ծանոթացավ խնդիրներին ու պայմաններին:
Պարոն Աբրահամյանը շրջեց դասասենյակներում, համակարգչային սենյակում, գրադարանում, մարզադահլիճում: Բերքաբեր համայնքի միջնակարգ դպրոցի տնօրեն Վոլոդյա Բալասանյանը, ԱԺ նախագահին ներկայացնելով դպրոցի խնդիրները, տեղեկացրեց, որ որոշ դասասենյակներ հակառակորդի թիրախում են եւ անվտանգության նկատառումներով չեն օգտագործվում: Նա նշեց, որ այս պահին դպրոցում 37 աշակերտ է սովորում, եւ այդ դասասենյակները օգտագործելու անհրաժեշտություն դեռեւս չկա, սակայն հետագայում նախատեսվում է երեխաների ավելացում: «Այս տարի մեր փոքրիկ գյուղում 11 երեխա է ծնվել, ինչը խոսում է այն մասին, որ ապագայում մենք այս դասասենյակները օգտագործելու խնդիր կունենանք»,- ասաց դպրոցի տնօրենի ժամանակավոր պաշտոնակատարը: Հովիկ Աբրահամյանը խոստացավ քայլեր ձեռնարկել, որպեսզի այդ դասասենյակներին զրահապատ պատուհաններ դրվեն: ԱԺ նախագահը խոստացավ նաեւ գրքեր տրամադրել դպրոցի գրադարանին:
Դպրոց այցելելուց հետո ԱԺ նախագահը հանդիպեց գյուղաբնակների հետ եւ ծավալված ջերմ ու անմիջական զրույցի ընթացքում տեղեկացավ գյուղի բազմաթիվ խնդիրների մասին, որոնք վերաբերում էին ջրամատակարարմանը, գազամատակարարմանը, աշխատատեղեր ստեղծելուն: Համայնքի ճանապարհը ասֆալտապատման կարիք ունի, գրեթե չկան մշակելի հողատարածքներ: Տավուշի մարզպետ Արմեն Ղուլարյանը տեղեկացրեց, Տավուշի մարզում մեծածավալ ճանապարհաշինարարական աշխատանքներ են իրականացվել եւ աստիճանաբար անբարեկարգ մյուս հատվածները եւս կասֆալտապատվեն, գազաֆիկացման, ջրամատակարարման աշխատանքները եւս ընթացքի մեջ են: ԱԺ նախագահը, լսելով բոլորի մտահոգությունները, նշեց, որ ՀՀ Նախագահի, ԱԺ-ի եւ կառավարության ուշադրության կենտրոնում են խնդիրները, եւ վստահեցրեց, որ ժամանակի ընթացքում լուծում կստանան: Նշենք, որ ԱԺ նախագահը դպրոցին նվիրեց համակարգիչներ, սպորտային պարագաներ:
ԱԺ նախագահ Հովիկ Աբրահամյանը եւ ԱԺ պատգամավորները այցելեցին նաեւ գյուղի նորակառույց եկեղեցի:
ԱԺ նախագահ Հովիկ Աբրահամյանի հաջորդ կանգառը Վազաշենն էր: Հովիկ Աբրահամյանը մարզպետի եւ պատգամավորների ուղեկցությամբ հետեւեց Տավուշի մարզի Բերդ-Իջեւան մայրուղու Վազաշեն-Պառավաքար վտանգավոր հատվածում կառուցվող շրջանցիկ ճանապարհի շինարարական աշխատանքներին:
Ճանապարհի շինարարությունն իրականացնող Իջեւանի ճանշինի ավագ աշխղեկ Դանիել Աբովյանը եւ ՀՀ ՏՆ «Տրանսպորտի ծրագրերի իրականացման գրասենյակ» պետական հիմնարկի տնօրեն Ալեքսանդր Բախտամյանը Հովիկ Աբրահամյանին ներկայացրին շինաշխատանքների ընթացքը` նշելով, որ շրջանցիկ ճանապարհն ունենալու է 3.2 կմ երկարություն եւ 6-7 մետր լայնություն եւ Վազաշեն-Պառավաքար հատվածում ճանապարհի երկարությունը կկրճատի մոտ երկու կիլոմետրով: Դանիել Աբովյանը հավաստիացրեց, որ ճանապարհը շահագործման կհանձնվի հունիսին, եւ ամբողջությամբ կլինի անվտանգ երթեւեկության համար:
Վազաշենցիները խորհրդարանի ղեկավարին դիմավորեցին համայնքը խորհրդանշող հուշակոթողի մոտ, որից հետո վերանորոգված համայնքային կենտրոնում տեղի ունեցավ Հովիկ Աբրահամյանի հանդիպումը բնակչության հետ:
Հանդիպմանը Հովիկ Աբրահամյանն ընդգծեց սահմանամերձ գյուղի կարեւորությունը` անհրաժեշտ համարելով համայնքի զարգացման ուղղությամբ յուրաքանչյուրի ներդրումը: Խորհրդարանի ղեկավարն առաջնային համարեց զորամասերի խնդիրների եւ զինվորականների սոցիալական հարցերի լուծումը:
Ազգային ժողովի նախագահը կարեւորեց այս համայնքներում դեմոգրաֆիական խնդիրը: Նա անհրաժեշտ համարեց սահմանամերձ համայնքներում ծնելիության խթանմանն ուղղված քայլերի ձեռնարկումը: Հովիկ Աբրահամյանը խոստացավ, որ 2014 թվականից յուրաքանչյուր ընտանիքում ծնված երեխայի համար Ազգային ժողովը կփոխանցի 100.000-ական դրամ` ներառելով 2013թ. ծնվածներին: ԱԺ նախագահը կարեւորեց բնակիչների հետ բարձրաստիճան պաշտոնյաների պարբերական շփումները: Ըստ Հովիկ Աբրահամյանի` չկարգավորված հակամարտության պայմաններում բանակի, սահմանների ամրապնդման ապահովումը մեր պետության գերակայությունն է:
Հանդիպման ընթացքում Ազգային Ժողովի նախագահը պատասխանեց նաեւ բնակիչներին հուզող հարցերին: Հովիկ Աբրահամյանը համայնքին նվիրեց համակարգիչներ:
Ազգային ժողովի նախագահ Հովիկ Աբրահամյանի հաջորդ կանգառը Ազատամուտ համայնքն էր: Մշակույթի տանը տեղի ունեցավ Հովիկ Աբրահամյանի եւ բնակիչների անմիջական շփումը: ԱԺ նախագահը ծանոթացավ մշակույթի տան, ինչպես նաեւ մանկապարտեզի շենքային պայմաններին եւ խոստացավ աջակցել առկա խնդիրների լուծմանը:
Հովիկ Աբրահամյանը խոստացավ ֆինանսական աջակցություն հատկացնել երաժշտական դպրոցին:
Ազատամուտում ԱԺ նախագահը ծաղիկներ դրեց «Մահ իմացյալ անմահություն» հուշակոթողին:
Ամփոփելով Տավուշի մարզ կատարած աշխատանքային այցի արդյունքները` Հովիկ Աբրահամյանը եւս մեկ անգամ կարեւորեց սահմանամերձ բնակավայրերի դերը: Աբրահամյանը նշեց, որ կառավարության հետ կձեռնարկեն քայլեր` օրենսդրորեն ամրագրելու սահմանապահ գյուղերի խնդիրները, տարանջատելու սահմանամերձ գյուղերի խնդիրները մյուս համայնքների խնդիրներից:
ԱԺ
