Արաբկիր Քանաքեռ-Զեյթուն վարչական շրջանների դատարանում այսօր Armenia Today կայքի համակարգող Արգիշտի Կիվիրյանի փաստաբանները դատավոր Արթուր Մկրտչյանի ինքնաբացարկի միջնորդություն ներկայացրին:
Հիշեցնենք, որ քրեական գործը Կիվիրյանի նկատմամբ հարուցվել է Կոմիտաս 5 հասցեում տեղի ունեցած իրադարձությունների հետեւանքով:
Փաստաբան Լուսինե Սահակյանն այսօր դատավորի ինքնաբացարկի միջնորդությունը հիմնավորեց նրա՝ անտեղյակությամբ.«Դատավորը չի ծանոթացել գործի նյութերին եւ չի կարող անաչառ լինել»:
Պարզվում է դատավորը մի շարք սխալներ է թույլ տվել, բայց դրանք նա վրիպակ համարեց:
Կարդացեք նաև
Նոյեմբերի 7-ին ՀՔԾ քննիչի կողմից Կիվիրյանի նկատմամբ խափանման միջոց կիրառելու որոշում է կայացվել,ըստ Լուսինե Սահակյանի: « Հետագայում այդ որոշումը վերացվել է, որովհետեւ դատախազին բողոք ենք ներկայացրել եւ դատախազի ցուցումով քննիչը վերացրել է այդ որոշումը: Ի զարմանս մեզ՝ դատարանից ստանում ենք որոշում՝ մեղադրյալի նկատմամբ խափանման միջոցը անփոփոխ թողնելու մասին՝ հիմնավորելով, քանի որ դեռ չի վերացել խափանման միջոցի կիրառման անհրաժեշտությունը: Դուք գործի նյութերին պարզապես չեք ցանկացել ծանոթացել, հարգելի դատարան: Եթե ծանոթացած լինեիք, գոնե պետք է տեսած լինեիք, որ խափանման միջոցը վերացված է»,- դիմեց դատավորին տիկին Սահակյանը:
Փաստաբանների խորհրդի անդամները նույնպես միջնորդության վերաբերյալ իրենց դիրքորոշումները հայտնեցին, իսկ փաստաբան Ռուբեն Սահակյանն էլ հավելեց, որ ինքն էլ է նկատել, դատավորի թույլ տված որոշակի խախտումներ.
«Դուք, իներցիայով եք շարժվել, միայն թե հաստատվի մեղադրող կողմի որոշման հիմնավորումները, չեք էլ ծանոթացել քննիչի որոշմանը, իսկ եթե ծանոթացել եք ու չեք նկատում խախտում, նշանակում է բավարար գիտելիքներ չունեք:
Ձեր կոպիտ սխալը փորձել եք մեկ այլ կոպիտ սխալով հրամցնել մեզ, սա կախվածություն է այն մարմնից, որը քննել է այս գործը, հոգեբանական կախվածություն, դուք այս գործը օբյեկտիվ չեք կարող վարել, որովհետեւ դուք կախյալ եք»:
Մոտ կես ժամ ընդմիջումից հետո դատավորը որոշեց ինքնաբացարկի միջնորդությունը մերժել՝ այն անհիմն համարելով: Ապա` ներկայացրեց խափանման միջոցի կիրառումն անփոփոխ թողնելու փետրվարի 10-ի իր որոշումը՝ փետրվարի 1-ի որոշման մեջ անճշտությունները վերացնելու մասին։ Կիվիրյանի փաստաբանները դատարանին խնդրեցին տրամադրել անճշտությունների վերաբերյալ որոշման արձանագրությունը կրիչի տեսքով: Դատարանը պարզ թղթային արձանագրության տեսքով տրամադրեց այն միայն այն բանից հետո, երբ այն բանից հետո, երբ Կիվիրյանի փաստաբաններն պնդեցին, որ իրենք այդ որոշմանը ծանոթանալուց հետո գուցե նոր բացարկ հայտնեն: Պաշտպանները պնդեցին ձայնագրությունը տրամադրել, իսկ դատավորը սրտնեղեց ու եւս տասը րոպե ընդմիջում հայտարարեց:
Դատավորի վերադարձից հետո, Կիվիրյանի պաշտպանները կրկին պնդեցին իրենց միջնորդությունը՝ հիմնավորելով, որ դատավորը փետրվարի տասին քարտուղարի ու առանց մեղադրող ու պատասխանող կողմերի որոշում է կայացրել:
Դատավորը կրկին ընդմիջում հայտարարեց, ինչից հետո կրկին մերժեց եւ դատական հաջորդ նիստը նշանակվեց փետրվարի 25-ին:
Դատական նիստի վերջում էլ Արգիշտի Կիվիրյանը հավելեց. «Մենք ձեզ տալիս ենք ունիվերսալ հնարավորություն այս միջնորդությունը բավարարելու և գործից դուրս գալու համար: Դուք քննությունը կատարել եք օրենսդրական խախտումներով, որոնք գնալով ավելի ու ավելի են խորանում»:
Արփինե ՍԻՄՈՆՅԱՆ
