«Քիչ առաջ ՀԱԿ պատգամավոր Լյուդմիլա Սարգսյանին թույլ տվեցին մուտք գործել Ոստիկանության կենտրոնի բաժանմունք»,-Aravot.am-ին դեպքի վայրից հայտնեց ՀԱԿ անդամ Վահագն Խաչատրյանը: Հիշեցնենք, որ ոստիկանները մարտի մեկի հանրահավաքի իրազեկման թռուցիկներ բաժանելիս Հյուսիսային պողոտայից ոստիկանության Կենտրոնի բաժանմունք են տարել ՀԱԿ ակտիվիստներ Հայկ Պետրոսյանին, Արեգ, Սարգիս, Անի Գեւորգյաններին, Սերգեյ Գասպարյանին, Դավիթ Վարդանյանին:
Պարոն Խաչատրյանը տեղեկացրեց, որ Կենտրոնի բաժանմունքին շուտով կմոտենան ՀԱԿ մյուս պատգամավորները՝ Լևոն Զուրաբյանը, Արամ Մանուկյանը և այլք, ովքեր մասնակցում էին Գյումրիի կառույցի ժողովին: Վահագն Խաչատրյանն ասաց. «Ոչ ոքի թույլ չեն տալիս մուտք գործել բաժանմունք, անգամ փաստաբանին: Ամեն ինչ պարզ է, բնական, այսօրվա Հայաստանի իրականությունն է: Եթե հանցագործ մասսային իշխանություն ես տալիս այսպես պիտի լինի»:
Վահագն Խաչատրյանը ևս մեկ անգամ փաստեց, որ քաղաքացիական հագուստով մարդիկ խանգարել են, հրահրել, ձեռնամարտի մեջ ներքաշել ՀԱԿ իրազեկող խմբին, ովքեր թռուցիկներ են բաժանել: Նրա համար կասկածելի է այն, որ ոստիկանները միանգամից արձագանքել են, կարծես նրանք արդեն գիտեին այդ մասին:
Լուսանկարը՝ Zham.am-ի, տեսանյութը՝ Civilnet.am-ի
Կարդացեք նաև
Տաթև ՀԱՐՈՒԹՅՈՒՆՅԱՆ
