Ս. Սարգսի տոնի առթիվ քահանաներն ու թատերական խումբն այցելել են սիրիահայերին, Երևանի կայազորի զինվորական հոսպիտալ, ռազմաօդային ինստիտուտ

Արարատյան Հայրապետական թեմի մամլո դիվանը հաղորդում է, որ Ս. Սարգսի տոնի առթիվ քահանաներն ու թատերական խումբն այցելել են սիրիահայերին, Երևանի կայազորի զինվորական հոսպիտալ, ռազմաօդային ինստիտուտ: Տոնակատարությունները շարունակվում են

Արագահաս բարեխոս Ս. Սարգիս զորավարի տոնը, որ Ն.Ս.Օ.Տ.Տ. Գարեգին Բ Ամենայն Հայոց Հայրապետի տնօրինությամբ հռչակված է երիտասարդների օրհնության օր, Արարատյան Հայրապետական թեմում առանձնահատուկ է նշվում:

ԱՀԹ առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանի օրհնությամբ տոնակատարությունները մեկնարկել են երկուշաբթիից:

Երեկ ԱՀԹ Մրգավանի Ս. Հակոբ եկեղեցու հոգևոր հովիվ Տ. Մխիթար քահանա Ալոյանը և «Ռոտոնդա» թատերախումբն այցելեցին Երևանի կայազորի զինվորական հոսպիտալ: Տեր հայրը հանդիպեց հոսպիտալում բուժվող զինվորներին, նրանց փոխանցեց Տ. Նավասարդ սրբազանի բարեմաղթանքները, բժշկության աղոթք կարդաց ու մաղթեց շուտափույթ ապաքինում: «Դուք պարտավոր եք շուտ ապաքինվել, քանի որ վստահ եմ, որ ձեր մայրերը, քույրերը ձեզ համար անդադար աղոթում են: Հայրենիքը բառերով չեն սիրում, հայրենիքը սկսվում է ձեր տանից, ձեր ծնողներից ու ձեր գյուղից, քաղաքից: Ես գիտեմ, որ յուրաքանչյուրիդ մեջ մի Վարդան Մամիկոնյան, մի Արմեն Հովհաննիսյան ու Նժդեհ է ապրում: Պինդ կացեք»,- ասաց տեր Մխիթարը:
Ս. Սարգսին նվիրված` թատերական ներկայացման ավարտին զինվորներից մի քանիսը որոշեցին հյուրերի համար երգել ռազմահայրենասիրական երգեր, ինչն ավելի աշխուժացրեց զինվորներին:
ԱՀԹ Նորագավիթի Ս. Գևորգ եկեղեցու հոգևոր հովիվ Տ. Վարդան քահանա Գափոյանն էլ այցելեց Թումանյանի թանգարան, որտեղ հավաքվել էին սիրիահայերը: Սիրիահայերը իրենց շնորհակալությունը հայտնեցին, որ հայրենիքում Հայ Եկեղեցին իրենց չի մոռանում ու Ս. Սարգսի տոնի առթիվ նման միջոցառում ու նվերներ է պատրաստում:
Ս. Սարգսի տոնն այսօր Արմենակ Խամփերյանցի անվան ռազմաօդային ինստիտուտում էր:
Իսկ փետրվարի 10-ին ԱՀԹ Զորավոր Ս. Աստվածածին եկեղեցու հոգևոր հովիվ Տ. Գրիգոր քահանա Գրիգորյանի հետ «Ռոտոնդա» թատերախումբն այցեց Գուրգեն Մարգարյանի անվան ավագ դպրոց և Մոնթե Մելքոնյանի անվան ռազմամարզական քոլեջ: Տեր հայրը երիտասարդներին ներկայացրել է տոնի պատմությունը, խորհուրդը և փոխանցել Տ. Նավասարդ սրբազանի օրհնության խոսքը: Այստեղ էլ տեր հոր խոսքը լրացրեց «Ռոտոնդա»-ն` Ս. Սարգսի նահատակության մասին բեմականացմամբ և տոնի ու Հայ Եկեղեցու մասին փոքրիկ վիկտորինայով: Հարցերին ճիշտ պատասխանած պատանիներն արժանացել են մրցանակների:

Հիշեցնենք, որ այս տարի երիտասարդների արագահաս բարեխոս սրբի տոնը նշվելու է փետրվարի 15-ին:

Այդ օրը Մայր Աթոռ Սուրբ Էջմիածնից Ն.Ս.Օ.Տ.Տ. Գարեգին Բ Ամենայն Հայոց Հայրապետի տնօրինությամբ երկրորդ անգամ Առաջնորդանիստ Ս. Սարգիս եկեղեցի կբերվեն Ս. Սարգիս Զորավարի մասունքները: Մատենադարանից էլ երկրպագության կբերվի 1693թ. Ս. Սարգիս եկեղեցում Ավետիս երեցի կողմից արտագրված Ս. Ավետարանը:
Ս. Պատարագի ընթացքում հավատավորները կկարողանան հաղորդ լինել սրբի մասունքներին և հայցել սրբի բարեխոսությունը: Իսկ Ս. Պատարագի ավարտին կկարողանան համբուրել Ս. Ավետարանը:

Նույն օրը` ժամը 14:30-ին, բազմաթիվ երիտասարդներ ոչ միայն Երևանից, այլ նաև ամբողջ Արարատյան Հայրապետական թեմից Առաջնորդանիստ Ս. Սարգիս եկեղեցուց Մեսրոպ Մաշտոց ու Բաղրամյան պողոտաներով խաչապտույտ կիրականացնեն դեպի Սիրահարների այգի: Խաչերթին միանալու ցանկություն են հայտնել նաև ռազմական ու ոստիկանական ակադեմիաների ուսանողները:

Սիրահարների այգում ավանդական դարձած տոնական համերգին մենահամերգով կներկայանա «Ռեինկարնացիա» խումբը:
Տոնակատարությունների մասին ավելի մանրամասն կարող եք կարդալ qahana.am կայքում:
Արարատյան Հայրապետական թեմի մամլո դիվան