Արդեն տեղեկացրել ենք, որ այսօր առավոտյան Երեւանի մետրոպոլիտենի աշխատակիցները դիմում են ներկայացրել իրենց ղեկավարությանը՝ պահանջելով պարտադիր կենսաթոշակային ֆոնդին իրենց աշխատավարձերից պահումներ չկատարել:
«Մարդկանց իրավունքներն են ոտնահարում: Ի՞նչ է նշանակում պարտադիր բաղադրիչ, թող լիներ կամավոր, այդ ժամանակ էլ իրենցից ինչ-որ մեկին ցույց տային, որ կամավոր միացել են այդ համակարգին: Պարտադիր են սարքում ու մարդկանցից ստիպողաբար փողերը տանում են, մեզ էլ ցույց են տալիս, որ տեսեք` էսքան մարդ միացել է»,-Aravot.am-ի հետ զրույցում ասացին մետրոպոլիտենի աշխատակիցները, որոնք առավոտյան ակցիա էին կազմակերպել մետրոպոլիտենի գլխավոր գրասենյակի մուտքի մոտ:
Կենսաթոշակային բարեփոխումներին դեմ մետրոպոլիտենի աշխատակիցները մեզ հետ զրույցում ասացին, որ աշխատավարձերը ստացել են արդեն պահումները կատարած`7000-15000 դրամ. «Մենք հիմա պայքարում ենք գործատուի դեմ, Սահմանադրական դատարանը կասեցրել էր, դա նշանակում է, որ պահումներ չպիտի լիներ: Իսկ եթե Սահմանադրական դատարանը օրենքն ընդունի, մենք կշարունակենք պայքարը ՍԴ-ի դեմ»:
Մետրոպոլիտենի աշխատակիցներին եկել էին աջակցելու «Դեմ եմ» քաղաքացիական նախաձեռնության անդամները:
Թիմի անդամներից մեկն իր ելույթում ասաց, որ իրենց տեղեկություններով, մետրոպոլիտենի աշխատակիցների վրա ճնշումներ են եղել, ինչի արդյունքում այսօր շատերը չեն մասնակցել ակցիային.«Անցել են այն ժամանակները, երբ ժողովրդին ապառնում են աշխատանքից ազատելով: Դուք պետք է գիտակցեք, որ ոչ ոք իրավունք չունի շանտաժ անել, դա քրեորեն պատժելի է: Ձեր գումարները ձեր սեփականությունն է եւ դուք ինքներդ պետք է տնօրինեք այն»:
Aravot.am-ի հետ զրույցում մետրոպոլիտենի աշխատակիցները հավաստիացրին, որ ղեկավարության կողմից ճնշումներ չեն եղել:
«Դեմ եմ» նախաձեռնության անդամներից մեկն էլ մեզ հետ զրույցում ասաց, որ վստահ է` Սահմանադրական դատարանը պարտադիր բաղադրիչը կհանի. «Վաղը Մաքսային միություն ենք մտնելու, մենք ի՞նչ իմանանք, թե մեր վալյուտան կփոխվի, թե ոչ, ռուբլի կդառնա, ինչ կլինի մեր կուտակած գումարների հետ: Վաղը կարող է Հայաստան պետություն չլինի, մեր գումարներն ի՞նչ կլինեն»:
Նելլի ԲԱԲԱՅԱՆ
