«ՀԵՀ-ի չարախոսները, չգիտես ինչու, շատացել են, և տնօրհնեքի իրականացումը փաստացի անհրաժեշտություն է դարձել»,-այսօր լրագրողների հետ հանդիպմանը կես կատակ- կես լուրջ հայտարարեց Հայաստանի երիտասարդական հիմնադրամի հոգաբարձուների խորհրդի համակարգող Կարեն Ավագյանը:
Այսօր Հայաստանի երիտասարդական հիմնադրամում Տյառնընդառաջի տոնի 10-օրյա միջոցառումների շրջանակներում տեղի ունեցավ տնօրհնեքի արարողություն, որն իրականացրեց տեր Հակոբ Քահանա Խաչատրյանը:
Սուրբ Գրիգոր Լուսավորիչ Մայր Եկեղեցու «Հավատամք» հոգևոր կենտրոնի երգչախմբի մասնակցությամբ տեղի ունեցավ համերգային ծրագիր:
Կարեն Ավագյանը տեղեկացրեց, որ ՀԵՀ-ը Հայ առաքելական եկեղեցու հետ տարվա կտրվածքով առանձին ծրագրեր է իրականացնում: Կոչ արեց երիտասարդներին պահպանել տնօրհնեքի արարողությունը:
Կարդացեք նաև
Տեր Հակոբն էլ նշեց, որ Տյառնընդառաջի նախօրեին «Ընդառաջ Աստծո, ընդառաջ սիրո» խորագրով միջոցառումների շարք է կազմակերպվել, այցելություններ են եղել զորամաս, մանկատուն, կրթօջախներ։ Այնուհետև ասաց. «Երիտասարդական հիմնադրամ այցելությունը շատ կարևոր է, քանի որ այս հաստատությունն իր մասնակցությունն է բերում եկեղեցու գործունեությանն ու առաքելությանը։ Իսկ եկեղեցին միայն քարե շինությունն ու հոգևորականները չեն։ Եկեղեցին կենդանի է, շնչում է իր հավատացյալներով։ Հայաստանի երիտասարդական հիմնադրամի հետ համագործակցության նպատակն է համատեղ ծրագրերով հանրությանը փոխանցել հոգևոր, ազգային գիտելիքներ»:
Տոնական միջոցառումների շարքը կավարտվի Սուրբ Գրիգոր Լուսավորիչ Մայր Եկեղեցում՝ տոնական համերգով:
Տաթև ՀԱՐՈՒԹՅՈՒՆՅԱՆ
