Պաշտոնյան կոչված է ծառայելու ժողովրդին
Երեւան քաղաքի Շինարարների փողոցի 15 շենքում դեռեւս բնակվող քաղաքացիները չեն զիջելու իրենց դիրքորոշումը՝ կապված վթարային շենքն ազատելու հետ: Խնդիրն այն է, որ շենքում դեռեւս բնակվողներն ունեն իրենց պահանջները՝ վերաբնակեցվելու հարցում: Քաղաքապետարանի կողմից առաջարկվել է վերաբնակեցում, սակայն, ինչպես նշում են բնակիչները, քաղաքապետարանի առաջարկած նոր բնակարանները համարժեք չեն իրենց ունեցած բնակմակերեսին, հաղորդում են նաեւ, որ քաղաքապետարանը տարբեր մոտեցում է ցուցաբերում շենքի նույն կարգավիճակում գտնվող բնակիչների միջեւ՝ դրանով իսկ խախտելով նրանց իրավունքները:
Այդ մասին կա նաեւ Մարդու իրավունքների պաշտպանի որոշումը քաղաքապետարանի իրավախախտման վերաբերյալ: Խնդրի վերաբերյալ քաղաքապետարանի կողմից կատարվում է շենքի «առգրավում», որի ծանր հետեւանքները ստիպված են լինում քաշել բնակիչները: Նրանք թվով 17-ն են եւ առաջացած խնդրի վերաբերյալ գործածում են օրենքի սահմանը չանցնող ամեն տարբերակ, ինչպես նաեւ՝ դիմել են դատարանի միջամտությանը (գործը գտնվում է դատական վարույթում):
Այդպիսով, բնակիչներն իրենց կոչն են անում Երեւանի քաղաքապետարանին, մասնավորապես՝ քաղաքապետ Տարոն Մարգարյանին, պատասխան արձագանք ակնկալելու միտումով, որպեսզի կատարվող գործողությունները լինեն օրինական ճանապարհներով եւ չխախտվեն մարդու ազատություններն ու իրավունքները: «Առավոտը» մեջբերում է բնակիչների կոչը. «Մարդիկ, որոնք պաշտոնի բերումով պետք է լսեն մեզ, հասկանան եւ փորձեն նորմալ, առանց շանտաժի լուծում տալ մեր խնդրին, մեղմ ասած, խուսափում են, եթե չասեմ՝ ագրեսիվ վարքագիծ են դրսեւորում, մոռանալով, որ պաշտոնյան կոչված է ծառայելու ժողովրդին: Այսպիսով, մենք առաջարկում ենք քաղաքապետարանի համապատասխան վարչության ներկայացուցիչների, լրատվական տարբեր միջոցների, իրավաբանների (երկկողմանի), Մարդու իրավունքների պաշտպանի գրասենյակի ներկայացուցչի եւ բնակիչներիս հանդիպումը մեր շենքում: Եվ պատրաստվեք մեր շենքի բնակիչների վերաբնակեցման վերաբերյալ ինֆորմացիայի թափանցիկությունն ապահովել: Թե չէ՝ գալ, գողունի ջուրն ու հոսանքն անջատել, հիվանդ մարդկանց, փոքր երեխաներին եւ, ընդհանրապես, ՀՀ քաղաքացիներին ապօրինաբար զրկել առաջին կարգի կենսական անհրաժեշտությունից, դա նույնիսկ թշնամին չէր անի:
Կարդացեք նաև
Եվ մի՛ պատճառաբանեք, թե շենքն ուր որ է՝ կփլուզվի, ու մենք կմնանք փլատակների տակ: Այսինքն՝ ստացվում է, որ քաղաքապետարանը մեր՝ բնակիչներիս մասին, որոնք 30 տարուց ավելի ապրում են վթարային շենքում եւ գիտակցաբար վտանգում են իրենց կյանքը, ավելի շատ է մտահոգվում, քան շենքի առաջին հարկում գտնվող սննդի խանութի աշխատողների եւ հաճախորդների մասին, որոնք տեղյակ չեն ո՛չ խանութի հակահիգիենիկ վիճակի, ո՛չ էլ շենքի փլուզման վտանգի մասին: Մի՞թե սա այն ավելի լավ Երեւանն է, որի մասին խոսում էր Տարոն Մարգարյանը»: Հիշեցնենք, որ Շինարարների փողոցի 15 շենքում դեռեւս բնակվող քաղաքացիներին շենքն ազատելու միտումով քաղաքապետարանը դիմել էր տարբեր միջոցների՝ կտրել էր խմելու ջրագիծը, ապա՝ անջատել էլեկտրականությունը:
ՍԵՐԳԵՅ ՀԱԿՈԲՅԱՆ
«Առավոտ» օրաթերթ
