«Սահմանադրական դատարանը վերահաստատել է իր որոշումը և նաև շեշտել, որ դա պետք է կատարվի»,-Aravot.am-ի հարցին ի՞նչ հետևություններ անել Սահմանադրական դատարանի` փետրվարի 11-ի աշխատակարգային որոշումից, այսպես պատասխանեց «Իրավունքի գերակայություն» ՀԿ-ի նախագահ Արտակ Զեյնալյանը, որը Պարտադիր բաղադրիչի սահմանադրականության վիճարկման դիմումով ՍԴ-ում ներկայացուցիչներից մեկն է
Հիշեցնենք, որ ՍԴ-ն ըստ էության, մերժեց Ազգային ժողովի ՀՅԴ խմբակցության անդամ Արծվիկ Մինասյանի միջնորդությունը: Պատգամավորը, որը նաև ՍԴ-ում «Կուտակային կենսաթոշակների մասին» օրենքի՝ 2014թ. հունվարի 1-ից գործողության մեջ դրվելիք պարտադիր կուտակային բաղադրիչի հետ կապված դրույթների սահմանադրականությունը որոշելու վերաբերյալ մարտի 28-ին քննվող գործով Ազգային ժողովի պատգամավորների պաշտոնական ներկայացուցիչն է, միջնորդել էր մինչև ՍԴ-ում գործով դատաքննության ավարտը կասեցնել օրենքի 8-րդ, 8.1-րդ, 14-րդ, 37-րդ և 38-րդ հոդվածների գործողությունը:
Արտակ Զեյնալյանը նաև շարունակեց. «ՍԴ-ն ուղղակի հարկ չի համարել վերանայել և փոփոխել իր որոշումը, որը արտացոլել է իր նախորդ որոշման մեջ: Եթե ՍԴ-ն լրացուցիչ միջոցներ կիրառելու վերաբերյալ որոշում կայացներ, հիմնավորեր և պատճառաբաներ, ապա դա կարող էր անդրադառնալ իրավունքի հարցերին և որոշակի կանխակալ վերաբերմունքի արտահայտություն լիներ: Ընդհանուր իրավիճակը հաշվի առնելով, նաև հաշվի առնելով այն իրավիճակը, որ Մարդու իրավունքների պաշտպանն իր կայքում տեղադրել է դրա մեկնաբանությունը`դա պետք է որ բավարար լինի պետական մարմինների կողմից ՍԴ որոշումը կատարելու համար և անձանցից առանց նրանց կամքը հաշվի առնելու գումարներ գանձելու իրավունք չունենալու համար»:
Արտակ Զեյնալյանն ասաց, որ ՍԴ որոշումը կոչված է կասեցնելու այն հոդվածները և դրույթները, որոնք կարող են բերել անդառնալի փոփոխությունների: Այնուհետև շեշտեց. «Իսկ թե պետական մարմիններն ինչպես են փորձում խորամանկել ու շրջանցել ՍԴ որոշումը, դա այս շրջանակներից դուրս է: ՍԴ-ն ևս մեկ անգամ վերահաստատել և ընդգծել է, որ որոշումը ճիշտ է և պետք է կատարվի և դրան կանդրադառնա կայացվելիք որոշման մեջ»:
Կարդացեք նաև
Տաթև ՀԱՐՈՒԹՅՈՒՆՅԱՆ
