Լոռու մարզի առաջին ատյանի դատարանում, դատավոր Նարինե Հովակիմյանի նախագահությամբ, շարունակվում է մեկ տարի առաջ «Մուշ» ռեստորանում փաստաբան Սամվել Շարբաթյանի սպանության մեջ մեղադրվող Սամվել Դիլոյանի, Արտակ եւ Արեն Վերանյանների դատաքննությունը:
Դատաքննությունը վկաների հարցաքննության փուլում է:
Թեեւ դատարանը 10 հոգու բերման ենթարկելու որոշում էր կայացրել, այսօրվա դատական նիստին երկուսն էին ներկա:
Այսօր դատարանում հարցաքննվեցին Սամվել Շարբաթյանի քրոջորդին` տուժողի իրավահաջորդի` Հասմիկ Մանուչարյանի որդին` Տիգրան Մանուչարյանն ու դեպքի վայր ժամանած շտապօգնության բժիշկ Յուրի Մկրտչյանը:
Կարդացեք նաև
Երկու վկաներն էլ դատարանում պնդեցին իրենց նախաքննական ցուցմունքները:
Վկա Տիգրան Մանուչարյանը հայտնեց, որ դեպքի վայր է հասել այն ժամանակ, երբ քեռին արդեն մահացած է եղել:
Բժիշկ Յուրի Մկրտչյանը դատարանին եւս հայտնեց, որ երբ ժամանել է դեպքի վայր, տեսել է` Սամվել Շարբաթյանն արդեն մահացած է:
Հակառակ սրան` տուժողի իրավահաջորդ Հասմիկ Մանուչարյանը նշեց, որ ինքը բժշկի` դեպքի վայր հասնելուց 20 րոպե անց է եղել ռեստորանում, եւ շոշափել է եղբոր աշխատող զարկերակը:
Անուշ ԲՈՒԼՂԱԴԱՐՅԱՆ
