Մոսկվայում խարդախության կասկածով հայի են ձերբակալել, որը, ներկայանալով որպես պաշտպանության նախարարությունում աշխատող գնդապետ, մարդկանց առաջարկում էր զեղչով գործարք կատարել: Հայտնում է «ԻՏԱՌ-ՏԱՍՍ»-ը:
«Օգտագործելով սոսնձված նկարներով կեղծ փաստաթղթեր, չարագործը, ներկայանալով պաշտպանության նախարարության գնդապետի կոչումով աշխատակից, հետաքրքրված անձանց առաջարկում էր խոշոր զեղչերով ձեռք բերել բնակարաններ, ինչպես նաև մարդատար և բեռնատար ավտոմեքենաներ: Բացի այդ, նա նաև առաջարկում էր իր միջոցով աշխատանքի ընդունվել պետծառայողների և անվտանգության ծառայությունների տարբեր ընկերությունների բարձր պաշտոններում», – ասել են ներքին գործերի նախարարությունից:
Իր առաջարկությունների դիմաց ստացած կանխավճարից հետո 48-ամյա տղամարդն անհայտանում էր:
ՆԳՆ-ի տվյալներով, 2012թ. նոյեմբերից մինչև 2013թ. փետրվար ընկած ժամանակահատվածում կասկածյալը մի քանի ընկերության ղեկավարներից մարդատար և բեռնատար ավտոմեքենա ձեռք բերելու համար հափշտակել է մոտ 4 միլիոն ռուբլի (մոտ 47 միլիոն դրամ):
Կարդացեք նաև
Փաստի առթիվ «խարդախության» հոդվածով քրեական գործ է հարուցվել:
«Կասկածյալի բնակարանի խուզարկման ժամանակ առգրավվել է Ռուսաստանի ճանապարհային ոստիկանության և դաշնային միգրացիոն ծառայության կնիքներ և դրոշմակնիքներ: Ըստ առկա տեղեկությունների, տղամարդը ներգրավված է 15 նմանատիպ հանցագործությունների մեջ, որը կատարվել է Մոսկվայի շրջանում», – հայտնել են ՆԳՆ մամուլի ծառայությունից:
Պատրաստեց Հովհաննես ԻՇԽԱՆՅԱՆԸ
