Վիլնյուսից հետո, Ռիգայից առաջ Հայաստան-Եվրամիություն հարաբերություններում նոր զարգացումներ են սպասվում: Վիլնյուսի գագաթաժողովից հետո ստեղծված իրավիճակը հասկանալու համար Արևելյան գործընկերության երկրների` Ուկրաինայի, Բելառուսի, Մոլդովայի, Հայաստանի, Վրաստանի և Ադրբեջանի հետ կքննարկվի «Եվրոպական փաթեթը»:
Aravot.am-ը Հայաստանի դեմոկրատական կուսակցության նախագահ Արամ Սարգսյանից հետաքրքրվեց`«Եվրոպական փաթեթը» նոր շա՞նս է հարաբերությունների սերտացման համար: Պարոն Սարգսյանը պատասխանեց. «Որքան ես եմ հասկանում, դա ներառում է բավականին լուրջ պարտավորություն ասոցացման պայմանագրի հետ կապված: Մենք ոչ թե պետք է Եվրոպային հակադրվենք, այլ եթե ընտրվել է այն քաղաքական վեկտորը, որով ուզում է գնալ Հայաստանը, ապա այդ ուղիով մինչև վերջ պետք է գնալ: Մի տեղից այլ տեղ փորձել տեղափոխվելն անլուրջ վերաբերմունք կլինի պետական քաղաքականության նկատմամբ: Եվրոպական հարաբերությունները պետք է տեսնել այն չափի մեջ, որը չի հակասում այն գործողություններին, որը եվրասիական ինտեգրման գործընթացների հետ է կապված: Հաշվի առնելով Ուկրաինայում կատարվող դեպքերը` ՀՀ իշխանությունները պիտի հետևողական լինեն իրենց գործողություններում ու որոշումներին համապատասխան գործեն: Եթե դրանք չեն հակասում մեկը մյուսին, կարելի է քննարկել նաև այդ փաթեթը»:
Փաթեթում անդրադարձ կատարելով ՌԴ-ին նշվում է. «Եվրամիության համար անընդունելի է Արևելյան գործընկերության երկրների նկատմամբ պատժիչ գործելակերպը»։ Այս առիթով պարոն Սարգսյանն ասաց. «Ես նման կետ չէի ընդունի և չէի էլ քննարկի: Ինքը՝ պետությունը պիտի որոշի ինչպիսի փոխհարաբերություններ է ձևավորում, այս կամ այն երկրի հետ: Եթե իշխանությունները չեն կարողանում պաշտպանել սեփական պետական շահերն, այստեղ ոչ ոք մեղավոր չէ»:
«Ժառանգություն» կուսակցության փոխնախագահ Արմեն Մարտիրոսյանն այս առիթով ասաց հետևյալը. «Գնահատելու համար պետք է փաթեթի ողջ բովանդակությանը ծանոթանանք: Եթե բովանդակային խնդիրներ փաստաթուղթը լուծում է, դա կլինի շանս: Եթե ընթացակարգային փաստաթուղթ է, բնականաբար դա կարելի է համարել «գալոչկայի» համար»:
Կարդացեք նաև
Տաթև ՀԱՐՈՒԹՅՈՒՆՅԱՆ
