Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Արշակ Վարդանյանի նախագահությամբ շարունակվեց Ռուսաստանի Դաշնության քաղաքացի, գործարար Ռուդիկ Բալասանյանի դեմ հարուցված քրեական գործի դատաքննությունը:
Դատական նիստին հանդես եկավ այս գործով տուժող ճանաչված, նախկին շրջկոմի, քաղկոմի քարտուղար, պատգամավոր, գործարար, «Լեռէքս» ընկերության տնօրեն Ռոլանդ Ղոնյանը:
Ըստ նրա՝ իրենք հիդրոէլեկտրակայաններ են կառուցել ջրատարների վրա, Ռուդիկ Բալասանյանն իրեն գումարներ է տվել,սակայն իրենք աշխատել են վնասով:Ըստ տուժողի, Ռուդիկն իրեն հետագայում անհանգստացրել է՝ պահանջելով իր գումարները: Տուժողն ասաց, որ գումարը տվել է գյուղնախարարի տեղակալ Վարդան Կարապետյանին, երրորդ անձի, որն ասել է, թե տվել է, իսկ Ռուդիկ Բալասանյանն ասել է՝ չի տվել, դիմել է քաղհայցով դատարան, եւ հարյուր հազար դոլարին համարժեք գումարի հայցը շահել: Դատարանի հարցին, թե իրոք տվել է գումարը Բալասանյանին, տուժողն ասաց. «Վարդանը մինիստր մարդ է, ոնց կարող էր գումարը չտալ»:
Ի դեպ, կողմերի վեճից հետո Ռ.Բալասանյանի բաժնեմասն անցել է Սուրիկ Օրբելյանին, որը արդարադատության նախարարի տեղակալ Արամ Օրբելյանի հորեղբոր որդին է…
Կարդացեք նաև
Նախաքննության մարմինը Ռուդիկ Բալասանյանին մեղադրանք է առաջադրել այն բանի համար, որ նա լիազորված անձ Սարգիս Խաչատրյանի միջոցով 2011թ. սեպտեմբերի 7-ին իրականությանը չհամապատասխանող տվյալներ ներկայացնելով` 151.500 ԱՄՆ դոլարին համարժեք 56.165.595 ՀՀ դրամ գումարի չափով բռնագանձման պահանջի, հայց է ներկայացրել Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան` խարդախության եղանակով փորձելով հափշտակել Ռոլանդ Ղոնյանին և Համլետ Ալոյանին պատկանող առանձնապես խոշոր չափերի գույքը:
Ռուդիկ Բալասանյանի շահերի պաշտպանն է փաստաբան Ժաննա Կոտիկյանը, իսկ տուժողների ներկայացուցիչն էր փաստաբան Վաղարշակ Գեւորգյանը:
Մանրամասները՝ քիչ հետո:
Ռուզան ՄԻՆԱՍՅԱՆ
