«Չնայած սեպտեմբերի երեքին ՀՀ նախագահի արված հայտարարությանը՝ եվրոպական ուղղությունը շարունակեց մնալ Հայաստանի իշխանությունների ուշադրության կենտրոնում»,-այսօր Մամուլի ազգային ակումբում հայտարարեց ՀՀ-ում Ֆրանսիայի արտակարգ եւ լիազոր դեսպան Արի Ռենոն`«Հայաստանի ճանապարհը դեպի Եվրոպա. խոչընդոտներ եւ հնարավորություններ» թեմայով քննարկման ժամանակ: Ըստ դիվանագետի, Վիլնյուսի գագաթաժողովի ժամանակ ընդունվեց համաձայնագիր, որով շարունակվեց Հայաստան-ԵՄ համագործակցությունը: «Արդեն իսկ նշված ոլորտներն իրենցից ներկայացնում են մի մեծ շինհրապարակ, որտեղ անելիքները շատ են», ասաց դեսպանը`շարունակելով.«ԵՄ-ն և Հայաստանը որոշում կայացրեցին վերանայել իրենց համագործակցության եզրերը: Հենց դա է մեր խնդիրը՝ նոր ոգի, նոր շունչ հաղորդել համագործակցությանը, որը երբևէ չի էլ դադարել»:
Դեսպանն ասաց, որ Ֆրանսիան երբեւիցե չի դադարել սատարել Հայաստանին այս ճանապարհին եւ շարունակելու է սատարել:
Նա փաստեց, որ Հայաստանը եվրոպամետ է եղել անկախությունը ձեռք բերելուց անմիջապես հետո. «Եվրոպամետ, որովհետև մասնակցում է նաև Արևելյան գործընկերության գործընթացին, խորապես եվրոպամետ՝ ընդհուպ մինչև Բոլոնյան գործընթացում իր ներկայությամբ»:
Ի դեպ, քննարկման մասնակցությանը չէին արձագանքել իշխող ՀՀԿ-ն, այլընտրանք ԲՀԿ-ն եւ ընդդիմադիր ՀՅԴ-ն: ԱԳՆ-ից պատասխանել էին, որ նման քննարկումների չեն մասնակցում:
Կարդացեք նաև
Նելլի ԳՐԻԳՈՐՅԱՆ
