Aravot.am-ի հետ զրույցում Երեւանի ավագանու «Բարեւ Երեւան» խմբակցության ղեկավար Անահիտ Բախշյանը անդրադարձավ այսօր տեղի ունեցած գործակարգավարական խորհրդակցությանը, որի ժամանակ անդրադարձ է եղել Երեւան քաղաքի տրանսպորտի վիճակին: Անահիտ Բախշյանի փոխանցմամբ այսօր հերթական անգամ քաղաքապետին է զեկուցվել այն, որ տրանսպորտային մի շարք խնդիրներ ու թերություններ կան եւ, որ երթուղիների հետ կնքված պայմանագրերը չեն գործում այնպես, ինչպես, որ հարկն է:
«Տարոն Մարգարյանը զգուշացրեց, որ եթե ինչ-որ երթուղի իր պայմանագրին համապատասխան չգործի, առանց ինձ հարցնելու պատրաստեք քաղաքապետի որոշման նախագիծ` այդ երթուղու պայմանագիրը խզելու մասին»,- ասաց Անահիտ Բախշյանը:
Դիտարկմանն էլ` թե նոր հասկացավ, որ պայմանագրերը չեն համապատասխանում սպասարկման որակին, Անահիտ Բախշյանը ասաց. «Ճիշտ է էլի էր ասել, բայց այսօր շատ կտրուկ էր: Ասաց առանց ինձ հետ համաձայնեցնելու կխզեք պայմանագիրն ու չասեք, թե այս գիծը սրանն է, նրանն է եւ այլն»:
Հարցին էլ` գուցե նրան հուշել են, կամ` արդյո՞ք դա պայմանավորված է նրանով, որ առաջիկայում տրանսպորտի գինը բարձրանալու է եւ քաղաքապետն էլ հնարավոր դժգոհությունների ալիքը մեղմելու եւ ցույց տալու համար, որ լավ բան էլ է անում, անդրադարձել է տրանսպորտի վիճակին, Անահիտ Բախշյանը պատասխանեց. «Ես այդքան էլ այդ կապը չեմ տեսնում տրանսպորտի գնի ու այսօրվա հանձնարարականի միջեւ: Չգիտեմ գուցե հուշել են, բայց դե ես ինչ գիտեմ քաղաքապետի գլխում ինչ կար այդ պահին, բայց փաստ է, որ նա շատ կոշտ ասաց այդ ամենը»:
Կարդացեք նաև
Եվա ՀԱԿՈԲՅԱՆ
