Ռուսաստանի Դաշնության կողմից զենք-զինամթերքի ապօրինի ձեռքբերման համար երկարատեւ ազատազրկման դատապարտված Մանուկ Հովիկյանի հայցի քննությանը Կենտրոն եւ Նորք-Մարաշ վարչական շրջանների ընդհանուր իրավասության դատարանում մասնակցում էր ութսունն անց մայրը` հնաբնակ երեւանցի , քույրը` Ազնիվ Հովիկյանը, իր անչափահաս երեխայով:
Գումար չլինելու պատճառով քաղաքացուն` Մանուկ Հովիկյանին որեւէ մեկը չէր ներկայացնում.չուներ իրավաբան, փաստաբան: Նա Ռուսաստանից գալով հայտնաբերել էր իր պապենական տունը «պետության կարիքների համար» քանդված, հայտնվել է փողոցում, իսկ մայրն էլ դեռ 10 տարի առաջ Հարավ-Արեւմտյան թաղամասում եղած բնակարանը քրոջ հետ վաճառել էր, որպեսզի հոգան իր`դատապարտյալի հոգսերը:
Կոնդի տունը քանդելուց հետո նրանք փոխհատուցում չեն ստացել, տուն չեն ստացել:
Դատավոր Գագիկ Խանդանյանն ապացույցներ էր ուզում, որով կհիմնավորվեր, որ քանդած տունը պատկանել է Մանուկին ու նրա գերդաստանին:
Կարդացեք նաև
«Եկել եմ այդ հասցեով չկա: Ում դիմել եմ, ասել են` չկա: Կառավարությանն էլ եմ դիմել:
Դատարանում են իմ ժիվոյ ապացույցները.մայրս, քույրս:Ուզում եք անալիզ վերցրեք, որ մենք թուրք չենք, հայ ենք: Իմ ձեռքի տակ հորս մահվան վկայականն է, որ նա իմ հայրն է, եւ նրա գերեզմանը: Կարող եք արտաշիրիմում արեք, որ ապացուցվի, որ գերեզմանում իմ հայրն է: Նպաստ չենք ստանում, մեր գրանցումն էլ օդի մեջ է»,-ասում էր Մ.Հովիկյանը:
Հովիկյանները դիմել են վարչապետին: Ազնիվը` քույրը հայտնել էր, որ ընտանեկան նպաստ է ստացել հայրական տանը, սակայն չունենալով մշտական փաստացի բնակության վայր, չի կարողացել նպաստի համար տեղեկանքներ ներկայացնել:
Դիմել են աշխատանքի եւ սոցիալական հարցերի նախարարություն. «Նրանք էլ հաշվի չառնելով, որ չունենք մշտական բնակության վայր, մերժել են օգնել մեզ` առանց գործի հանգամանքներին ծանոթանալու»:
Հովիկյաններն առանձին-առանձին ունեն բուժման կարիք, բայց չունեն գումար:
Որեւէ արտոնություն, բնականաբար, չի տարածվում այս ընտանիքի վրա, քանի որ նպաստներից են զրկված:
Ընտանիքն առհասարակ հաշվառված չէր ընտանիքների ապահովության գնահատման համակարգում: Իսկ դա նշանակում էր, որ չհաշվառվածները չեն կարող օգտվել այդ համակարգով տրամադրվող որևէ աջակցությունից` մարդասիրական օգնություններից, միանվագ դրամական օգնությունից, հրատապ օգնություններից ու նպաստից:
Դատարանն իր որոշումը կհրապարակի փետրվարի 25-ին:
Ռուզան ՄԻՆԱՍՅԱՆ
