Այս տարվա սկզբին մի շարք անհատ տաքսու վարորդներ դժգոհում էին, որ ապահովագրական ընկերությունները հրաժարվում են տաքսիներին ապահովագրել, հետեւաբար այս վարորդները զրկվում են նաեւ ԱՊՊԱ կտրոնից եւ աշխատելու հնարավորությունից:
Հունվարի 16-ին «Աքիլես» ավտովարորդների իրավունքների պաշտպանության կենտրոնի իրավաբան Արմինե Մկրտչյանն ասել էր` եթե նախկինում ապահովագրական ընկերությունները տաքսի մեքենաները բարձր գներով էին ապահովագրում, ապա վերջին 2 շաբաթում հրաժարվում են ընդհանրապես ապահովագրել, ըստ որում, այս ընկերությունները ոչ թե բացահայտ մերժում են, այլ տարբեր անհիմն պատճառաբանություններ են ներկայացնում: Իսկ չապահովագրելու պատճառը տաքսի մեքենաների բարձր ռիսկայնությունն է: Դեռ հունվարի 16-ի դրությամբ, «Աքիլեսին» մի քանի տասնյակ անհատ տաքսու վարորդներ էին դիմել:
Այսօր Aravot.am-ը «Աքիլեսի» նախագահ Էդուարդ Հովհաննիսյանից հետաքրքրվեց, թե ինչով ավարտվեց վարորդների խնդիրը: Այս առնչությամբ պարոն Հովհաննիսյանն ասաց. «Հենց մի մեքենայի չեն ապահովագրում ինչ-որ ապահովագրական ընկերություններ, թող դիմեն գրավոր այդ ընկերությանը, ու եթե պատասխան չեն ստանում, նոր դիմեն մեզ: ԱՊՊԱ բյուրոն ասում է՝ մեզ եկել է ընդամենը 3 բողոք, իսկ ընկերություններն էլ չեն անում, բողոքարկողներն էլ քիչ են, վարորդներն էլ զահլա չունեն: Ահազանգեր են եղել, գրավոր ոչ ոք չի դիմել, բոլորին ասում ենք` թղթով, միայն գրավոր լինի բողոքը, գրավոր դիմեք ապահովագրական ընկերություններին, որից հետո մենք կարողանանք դիմումին ընթացք տան»:
Մանրամասն՝ տեսանյութում
Նելլի ԲԱԲԱՅԱՆ
