Փետրվարի 7-ին Արցախի Հանրապետության վարչապետ Արա Հարությունյանն այցելեց Սոս գյուղ և Մարտունի քաղաք՝ այդ համայնքների ղեկավարների՝ 2013 թ. գործունեության հաշվետվությունների ներկայացմանը մասնակցելու և տեղի բնակչության հետ հանդիպելու նպատակով:
Ըստ հաշվետվության՝ Սոս գյուղում 2013 թ. Բյուջեն կատարվել է շուրջ 108 տոկոսով: Գործադիրի ղեկավարը ողջունեց նախատեսված աշխատանքների արդյունավետ կատարումը և այդ համայնքի ինքնաֆինանսավորվող լինելու հանգամանքը: Իր խոսքում Ա. Հարությունյանն անդրադարձավ գյուղում կառավարության կողմից իրագործված, ինչպես նաև նախատեսվող աշխատանքներին՝ այլ ծրագրերի շարքում կարևորելով մանկապարտեզի վերջերս շահագործված նոր շենքի կառուցումը: Կառավարության ղեկավարը տեղեկացրեց ներկաներին, որ պետական ծրագրերի շրջանակներում նախատեսվում է մինչև տարեվերջ սկսել գյուղի դպրոցի նոր շենքի կառուցումը: Ավելին՝ 2014 թ. ընթացքում ընդհանուր առմամբ կլուծվի նաև համայնքի հողատարածքների ոռոգման ջրի խնդիրը, ինչը թույլ կտա ոչ միայն բարձրացնել ավանդական մշակաբույսերի բերքատվությունը, այլ նաև զբաղվել նոր՝ բանջարաբոստանային կուլտուրաների մշակմամբ: Վարչապետն ընդգծեց նշված և մի շարք այլ ծրագրերի առանցքային դերակատարումը նոր աշխատատեղերի ստեղծման գործում, ինչը գյուղի գլխավոր հիմնախնդիրն է:
Պատասխանելով ներկաների հարցերին՝ Ա. Հարությունյանն անդրադարձավ գյուղատնտեսական ապրանքների՝ Արցախում գործող գներին: Նրա խոսքով՝ իրականում դրանք բավականին բարձր են միջազգային գների համեմատ: Վարչապետը նշեց, որ, այնուամենայնիվ, երբեմն կառավարությանը հաջողվում է պետական միջամտությամբ արհեստականորեն բարձր պահել գները, որպեսզի տեղական արտադրողները կորուստներ չունենան: Գործադիրի ղեկավարի համոզմամբ՝ խնդիրը ոչ բավարար մակարդակի բերքատվության մեջ է, ինչը թույլ չի տալիս գյուղացիներին իրական գներով վաճառել իրենց արտադրանքը: Ա. Հարությունյանը կոչ արեց բնակիչներին ձգտել բերքատվության և ոչ թե գների բարձրացման, մանավանդ, որ պետական նշանակալի աջակցություն կա այդ ուղղությամբ՝ պարարտանյութերի, սերմացուների, սուբսիդիաների, արտոնյալ վարկային միջոցների տրամադրման տեսքով:
Կառավարության ղեկավարը, մասնակցելով Մարտունու քաղաքապետի հաշվետվությանը, ընդգծեց այդ համայնքի կարևոր նշանակությունը ողջ հանրապետության համար: Մատնանշելով Մարտունու ենթակառուցվածքների զարգացման ուղղությամբ արդեն կատարված աշխատանքները՝ վարչապետը նշեց, որ միջոցների սղության պատճառով դեռևս գոյություն ունեն որոշ կարևոր անելիքներ: Կատարված աշխատանքներից Ա. Հարությունյանն առանձնացրեց դպրոցի և հիվանդանոցի նոր շենքերի կառուցումը: Իսկ ինչ վերաբերում է անելիքներին, բնակիչները մատնանշեցին մանկապարտեզի, մարզադաշտի, ինչպես նաև որոշ այլ ենթակառուցվածքների կառուցման անհրաժեշտությունը: Ըստ գործադիրի ղեկավարի՝ այդ խնդիրները մոտակա տարիներին աստիճանաբար կլուծվեն: Վարչապետ Հարությունյանը հայտարարեց, որ այս տարվա ընթացքում ավարտին կհասցվի Ստեփանակերտ-Նինգի-Մարտունի ճանապարհի ասֆալտապատումը, որը ռազմավարական նշանակություն ունի Արցախի համար: Ավելին՝ համայնքում մեծ թափ է ստանում բնակարանաշինությունը՝ ներգրավելով նոր ներդրումներ և լրացուցիչ արտոնյալ վարկային միջոցներ:
Կարդացեք նաև
Անդրադառնալով աշխատատեղերի ստեղծման հարցին՝ կառավարության ղեկավարը, բացի շինարարությունից, կոչ արեց ավելի արդյունավետորեն օգտագործել գյուղատնտեսության հնարավորությունները: Նրա խոսքով՝ ավելի մեծ ուշադրություն է դարձվելու ոռոգման համակարգի զարգացմանը, ինչը խթան կհանդիսանա գյուղատնտեսության զարգացման համար: Ա. Հարությունյանն առանձնացրեց նաև ծխախոտագործության համար առկա բարենպաստ պայմանները այդ տարածաշրջանում, որոնցից օգտվելու կոչ արեց բնակչությանը՝ խոստանալով հնարավորինս աջակցել նրանց այդ գործում:
Հանդիպումների վերջում բնակիչները հանդես եկան հարցերով և առաջարկություններով: Վարչապետը տվեց համապատասխան հանձնարարականներ և խոստացավ շարունակական ուշադրության ներքո պահել Սոսի և Մարտունու համայնքների հիմնախնդիրները:
ԼՂՀ կառավարություն
