Այսօր Գյումրու կայարանամերձ հրապարակում մարզի նորանշանակ ոստիկանապետ Վարդան Նադարյանի անցկացրած հրահանգավորման ժամանակ լրագրողները ոստիկանապետից հետաքրքրվեցին, թե ի՞նչ կասի ոստիկանների աշխատավարձի մասին: Ըստ ոստիկանապետի, եթե հարցը ուղղվի ցանկացած ոլորտի ներկայացուցչի` հասարակական և թե պետական, ամեն մեկն էլ կուզենա, որ իր աշխատավարձը բարձրանա, բարեկեցիկ ու լավ կյանքով ապրի: Իսկ ինչքա՞ն է ստանում ոստիկանն ու ոստիկանապետը, բավարարո՞ւմ է արդյոք աշխատավարձը, այս հարցին ի պատասխան գնդապետ Նադարյանն ասաց, որ իրենցը նորմալ աշխատավարձով աշխատանք է համարվում մեր երկրում: Ըստ նրա, աշխատավարձի բարձրացումը յուրաքանչյուր ոլորտում խթան կհանդիսանա, սակայն ոստիկանը հասարակության այն շերտն է, այն տեսակը, ով,անկախ ամեն ինչից , այս պայմաններում էլ իրեն դրսևրում է:
Ոստիկանապետը խոսեց նաև այն մասին, որ Շիրակի մարզում կադրային փոփոխությունները ու առողջացման ծրագիրը շարունակվելու են, ժողովրդի հետ մաքսիմալ թափանցիկ են աշխատելու, և ավելի կոմպետենտ մարդկանց են աշխատանքի վերցնելու:
«Կադրերն են որոշում ամեն ինչը, բոլոր օրենքները, ցուցումները, որոնք դրվում են, իրականացվում են կոմպետենտ կադրերի, փորձառու աշխատակիցների միջոցով: Էդ առումով շատ կարևորվում է մարդկանց բարոյահոգեբանական կերպարը , բարեկրթությունը, մասնագիտությանը տիրապետելը», – ասաց Վարդան Նադարյանը:
Ըստ նրա, հասարակության վստահության կորուստը ոչ թե պայմանավորված է համակարգի վատ աշխատելով, այլ անհատ ոստիկանների, որոնցից ոմանք պախարակել են ոստիկանի պատվաբեր աշխատանքը: Թեև այդպիսինները, ոստիկանապետի ասելով, հեռացվում են համակարգից, դատական հետապնդումների մեջ են հայտնվում:
Կարդացեք նաև
Ի դեպ, ըստ գնդապետ Նադարյանի, Շիրակի մարզը, որը գտնվում է սոցիալապես ծանր վիճակում, մյուս մարզերի հետ համեմատ ոչ մի յուրահատկություն չունի հանցագործությունների առումով:
Նունե ԱՐԵՎՇԱՏՅԱՆ
