«Ուկրաինայում տեղի ունեցող իրադարձությունները, բնականաբար, լարվածություն առաջացրել են ԵՄ-ՌԴ հարաբերություններում, սակայն այս պահին իրավիճակը ես չէի բնորոշի որպես ճգնաժամային: Երկու կողմերն էլ ունեն բազմաթիվ փոխադարձ հետաքրքրություններ, փոխադարձ կախվածություն եւ դեռ խուսափում են, մասնավորապես՝ ԵՄ-ն, բացահայտ առճակատումից: Իրավիճակը կարող է փոխվել, եթե Սոչիի Օլիմպիական խաղերի ավարտից հետո ՌԴ իշխանությունները բացահայտ եւ առարկայական դարձնեն իրենց միջամտությունը ուկրաինական իրադարձություններին, ստիպեն Ուկրաինայի իշխանություններին դիմել ուժային մեթոդների՝ դրանով առաջացնելով քաղաքացիական պատերազմ եւ որպես դրա հետեւանք՝ Ուկրաինայի տրոհման սպառնալիք»,- «Առավոտ»-ին ասաց Ժողովրդավարության, անվտանգության եւ զարգացման հայկական կենտրոնի փորձագետ, ՀՀ ԱԳՆ ՆԱՏՕ-ի բաժնի նախկին վարիչ Մարթա Այվազյանը՝ անդրադառնալով ԵՄ-ՌԴ ճգնաժամային հարաբերություններին, դրանց վրա ուկրաինական իրադարձությունների ազդեցությանը:
«Առավոտ» օրաթերթ
