Կամո Մանգասարյանը դիմել էր ՀՀ տարածքային կառավարման նախարարության միգրացիոն պետական ծառայություն (ՄՊԾ)՝ խնդրանքով, որ իրեն տրամադրեն բնակարանի գնման վկայագիր (ԲԳՎ): Միգրացիոն ծառայությունը մերժել է՝ պատճառաբանելով, որ նրանց ընտանիքը 2003 թվականի օգոստոսի 1-ի դրությամբ Միգրացիայի եւ փախստականների նախկին վարչության կողմից չի հաշվառվել որպես փախստական ընտանիք: Առաջացած խնդրի վերաբերյալ Կամոյի եղբայրը՝ Յուրին, հայցադիմում էր ներկայացրել Հայաստանի վարչական դատարանում, որտեղ էլ դատավորը նրա հայցը բավարարել էր մասնակի՝ անվավեր է ճանաչվել 18.12.2009 թվականի թիվ 430/2 գրությունը:
Նշված վճռով դատարանը նշել է. «Սույն գործով վիճարկվող ակտի ընդունման համար հիմք ծառայած փաստական հանգամանքների, այն է՝ բացակայության պատճառով 2003 թվականի օգոստոսի 1-ի դրությամբ իր փաստացի բնակության հասցեից բացակայելու, այդ պատճառով հաշվառված չլինելու, առաջնահերթ ծրագրում ընդգրկված չլինելու հանգամանքի ապացուցման բեռը կրում է նշված ակտն ընդունած պետական մարմինը՝ ՀՀ ՏԿՆ միգրացիոն պետական ծառայությունը»: Դատարանը հայցը բավարարել է, քանի որ հաստատված է համարել, որ Մանգասարյանների ընտանիքը 2003 թվականի օգոստոսի 1-ի դրությամբ իրենց բնակության վայրից բացակայելու վերաբերյալ պատասխանող Միգրացիոն պետական ծառայությունը որեւէ ապացույց չի ներկայացրել: Երկրորդ՝ բնակարանի գնման վկայագիր տրամադրելուն պարտավորեցնելու հայցապահանջը, որն ուղղված է եղել ՀՀ քաղաքաշինության նախարարությանը, մերժվել է, քանի որ ՀՀ քաղաքաշինության նախարարությունը հայտնել է, որ պատասխանողը՝ ՄՊԾ-ն, այս ընտանիքի մասին իրենց որեւէ տեղեկատվություն չի տրամադրել: 20.05. 2004 թվականին ընդունվել է ՀՀ կառավարության թիվ 747-Ն որոշումը՝ 1988-1992թթ. Ադրբեջանից բռնագաղթած անձանց բնակարանային ապահովության առաջնահերթ ծրագրի մասին: Ծրագրի շահառուների ընտրության չափանիշները հետեւյալն էին. բնակվում են ժամանակավոր կացարաններում, ինչպես նաեւ, բացի նշված ընդհանուր պայմաններից, ծրագրի շահառուների ընտրության հիմքում որպես չափանիշ համարվում է 2003 թվականի օգոստոսի 1-ի դրությամբ ժամանակավոր կացարաններում եւ վագոն-տնակներում փախստական ընտանիքների փաստացի բնակությունը: Ընտանիքի ոչ ներկա անդամները դիտվում են շահառու եւ ընդգրկվում են տվյալ ընտանիքի կազմում, եթե նրանց բացակայությունը պայմանավորված է Հայաստանի Հանրապետության զինված ուժերում ծառայության կամ բուժման, կամ ուսման, կամ ազատազրկման վայրում պատիժը կրելու հետ:
Վճռով հաստատվել է, որ Մանգասարյանների ընտանիքը 2003 թվականի օգոստոսի 1-ի դրությամբ փաստացի բնակվել է Նորքի այգիներ 227 հասցեում, իսկ Յուրի Մանգասարյանը 2002-2004 թթ. ծառայել է ՀՀ զինված ուժերում: Փաստացի, նշված ընտանիքը համարվում է բնակարանային ապահովության առաջնահերթ ծրագրի շահառու:
Յուրի Մանգասարյանը 01.10. 2013թ. դիմել է Միգրացիոն ծառայությանը՝ իրենց ընտանիքին բնակարանային ապահովության առաջնահերթ ծրագրի ցուցակում ընդգրկելու խնդրանքով: Ի պատասխան՝ 18.10. 2013թ. թիվ 01/07/2823-13 գրությամբ ծառայությունից հայտնել են, որ նրանց ընտանիքը չի ընդգրկվել ՀՀ կառավարության 2004թ. մայիսի 20-ի թիվ 747-Ն որոշմամբ հաստատված՝ 1988-1992թթ. Ադրբեջանից բռնագաղթած անձանց բնակապահովության առաջնահերթ ծրագրում: Հարկ ենք համարում տեղեկացնել, որ Յուրի Մանգասարյանն իր ընտանիքի անդամների հետ, որը բաղկացած է 3 շնչից՝ Կամո, Յուրի եւ Իդա Մանգասարյաններ, միասին 1988 թվականին Ադրբեջանից բռնագաղթել են Հայաստան եւ ստացել փախստականի կարգավիճակ:
1989 թվականին իրենց ընտանիքին հատկացվել է ժամանակավոր կացարան՝ նախկինում Հայաստանի կոմունիստական կուսակցության կետրոնական կոմիտեի բարձրագույն կուսակցական դպրոցին պատկանող Երեւանի Նորքի այգիներ թիվ 227 հասցեում գտնվող շենքում, որտեղ էլ բնակվում են առ այսօր: Հետեւաբար, Մանգասարյանների ընտանիքը բավարարում է 20.05.2004 թվականի ՀՀ կառավարության թիվ 747-Ն որոշման պահանջներին, որն էլ հաստատվել է ՀՀ վարչական դատարանի վճռով եւ մտել օրինական ուժի մեջ, որից էլ հետեւություն՝ համաձայն 24. 02. 2005 թվականի ՀՀ կառավարության թիվ 309-Ն որոշման՝ պետք է նրանց ընտանիքը ընդգրկվի բնակարանի կարիքավորների առաջնահերթ ցուցակում: Այդ մասով Յուրի Մանգասարյանը հայցադիմում է ներկայացրել Հայաստանի վարչական դատարանում: Այս անգամ նա դատարանից խնդրում է, որպեսզի հայցը բավարարեն եւ պարտավորեցնեն ՄՊԾ-ին, որ նրա ընտանիքին ընդգրկեն բնակարանի կարիքավորների առաջնահերթ ցուցակում: Նախնական դատական նիստը, որը նշանակվել էր փետրվարի 3-ին, հետաձգվել է անորոշ ժամանակով:
Կարդացեք նաև
ՍԵՐԳԵՅ ՀԱԿՈԲՅԱՆ
«Առավոտ» օրաթերթ
