«Եթե ՀՀԿ-ն ուզում է գազի խնդրով հանձնաժողով ստեղծել, քավ լիցի, թող ստեղծի, մենք կարող ենք դա ՀՀԿ կուսակցության անվան գազի հանձնաժողով անվանել: Որևէ ամբիցիա չունենք: Կարևորը հանրությանն ու կուսակցություններին հուզող հարցերի պատասխանները հնչեն»,- այսօր խորհրդարանական ճեպազրույցների ժամանակ ասաց ԲՀԿ խմբակցության քարտուղար Նաիրա Զոհրաբյանը:
Հարցին` ԲՀԿ-ն իշխանափոխության հարցը դիտարկո՞ւմ է, Նաիրա Զոհրաբյանը պատասխանեց. «Իշխանափոխություն ասելով՝ իշխանափոխություն չի լինում և չի լինելու: Այո, մեր երկիրը կանգնած է լրջագույն մարտահրավերների առջև, այո, այսպես շարունակել չի կարելի, երկրին անհրաժեշտ են համակարգային փոփոխություններ: Չորս ուժեր լրջագույն քաղաքական միավորման քայլ են անում, փոքր քայլերով շարժվում ենք առաջ: Կվերածվի՞ սա շատ ավելի լայն խնդիրներ ընդգրկող օրակարգի, եկեք առաջ չընկնենք: Մենք ասում ենք՝ մեր երկրում չպիտի լինի մեկ քաղաքական ուժի քաղաքական մենաշնորհ, ողջ խնդիրները գալիս են դրանից: Բայց մի բան կարող եմ հստակ ասել` հաջորդ քառօրյայում չորս քաղաքական ուժերը հանդես կգան լրջագույն առաջարկով, որի մասին կտեղեկանաք քառօրյային ընդառաջ»»:
Նաիրա Զոհրաբյանը, պատասխանելով լրագրողներից մեկի հարցին, ասաց, որ եթե ժողովուրդը դուրս գա փողոց, ՀՀԿ-ից ամենամեծ կտորը ականջը կմնա:
Նա նաև տեղեկացրեց, որ փետրվարի 15-ին տեղի է ունենալու ԲՀԿ-ի համագումարը, որի ժամանակ հնչելու են շատ հարցերի պատասխաններ:
Կարդացեք նաև
Նելլի ԳՐԻԳՈՐՅԱՆ
