«Դեմ եմ» նախաձեռնության անդամները բազմիցս հայտարարել են, որ համատարած ճնշումներ են իրականացվում ՀՀ հանրակրթական դպրոցներում և մանկապարտեզներում` աշխատակիցներին պարտադրում են ընտրել կենսաթոշակային ֆոնդեր, թեև օրենքով դրա իրավունքը չկա:
Երեկ էլ «Դեմ եմ» նախաձեռնության կազմակերպած «Իրավունքի նվաճման» երթը մեկնարկեց ԿԳՆ-ի շենքի մոտից, ու նախաձեռնության անդամ Դավիթ Խաժակյանը պարզաբանեց. «Պատահական չէ, որ ընդդեմ պարտադիր կենսաթոշակային համակարգի երթը այսօր սկսում ենք ԿԳ նախարարության շենքի մոտից: Պատճառն այն է, որ դպրոցներում և մանկապարտեզներում տոտալ ճնշումներ են իրականացվում աշխատակիցների նկատմամբ, որոնց պարտադրում են ընտրել կենսաթոշակային ֆոնդերը, թեև օրենքը կասեցված է և դրա իրավունքը չկա: Ուստի մեր ուղերձը ուղղված է նաև ԿԳՆ-ին»:
Aravot.am-ը գրավոր հարցում ուղարկեց ԿԳ նախարարություն՝ արդյոք նախարարությունում տեղյա՞կ են ճնշումների մասին: ԿԳՆ աշխատակազմի ղեկավար Մհեր Ղազարյանը գրավոր պատասխանեց. «Ի պատասխան «Առավոտ» օրաթերթի 2014 թվականի փետրվարի 3-ի Ձեր հարցման՝ պարզաբանում ենք, որ «Կուտակային կենսաթոշակի մասին» ՀՀ օրենքի առնչությամբ ՀՀ կրթության և գիտության նախարարության կողմից ՀՀ հանրակրթական ուսումնական հաստատություններին և նախադպրոցական ուսումնական հաստատություններին որևէ բանավոր կամ գրավոր ցուցում չի տրվել: Հավելենք, որ նախարարության ուսումնական հաստատությունները համայնքային ենթակայության են և ՀՀ օրենսդրության համաձայն՝ հաստատությունների ընդհանուր կառավարումը, նրանց բնականոն գործունեության ապահովումը, ֆինանսավորումը վերապահված է տեղական ինքնակառավարման մարմիններին»:
Տաթև ՀԱՐՈՒԹՅՈՒՆՅԱՆ
