Հունվարին բռնցքամարտի Հայաստանի ազգային հավաքականի ծաղկաձորյան ուսումնամարզական հավաքի ժամանակ Aravot.am-ը ֆեդերացիայի նախագահ, ԱԺ պատգամավոր Արթուր Գեւորգյանի հետ զրույցում խոսել էր նաեւ ազգային հավաքականի նորանշանակ գլխավոր մարզիչ Դավիթ Թորոսյանի մասնագիտական գործունեության հետ ժամանակին առնչված երկու հարցի շուրջ:
– Պարոն Գեւորգյան: Դուք ազգային հավաքականի գլխավոր մարզիչ նշանակել եք Մոնրեալի օլիմպիական խաղերի եւ 1974 թ. Հավանայում անցկացված աշխարհի առաջնության բրոնզե մեդալակիր Դավիթ Թորոսյանին:
– Այո: Եվ կարծում եմ, որ նա կարող է շատ օգտակար լինել թիմին:
– Բայց Դավիթ Թորոսյանը ժամանակին արդեն զբաղեցրել է այդ պաշտոնը եւ ըստ շրջանառվող լուրերի, նրա օրոք արդյունքներ չեղան, ինչի համար ազատել են:
Կարդացեք նաև
– Ճշտեմ: Ոչ թե արդյունքներ չեղան ու այդ պատճառով ազատեցին, այլ նա հեռացավ: Դավիթ Թորոսյանը, ինչպես անվանի մարզիկներից շատերը, բնավորություն ունի: Այն ժամանակ իշխանությունները Դավիթ Թորոսյանի համար չստեղծեցին պայմաններ, որպեսզի շարունակեր աշխատել: Եվ քանի որ նա այդ պաշտոնին կառչած չէր, ինչպես ասում են, թքեց ու գնաց, ԱՄՆ-ում փորձեց իր մասնագիտական ունակությունները եւ ավելի հզոր փորձ ձեռք բերեց: Եթե մասնագետն իրենից ինչ-որ բան ներկայացնում է, նա որոշ դեպքերում եւ թելադրում է, եւ իր բնավորությունն է ցույց տալիս: Չնայած դժվար է, ես ուզում եմ աշխատել այդպիսի մասնագետների հետ: Եվ կարծում եմ, նա գործող բռնցամարտիկներին շատ բան ունի փոխանցելու:
– Նաեւ այն կարծիքն է տարածված, թե Դավիթ Թորոսյանն այն տարիներին մեր հավաքականի լավագույն բռնցքամարտիկներին համոզում, տանում էր պրոֆեսիոնալ ռինգ:
– Ձեր նշած լավ բռնցքամարտիկներից մեկն էլ, թող անհամեստ չթվա, ես եմ եղել, որ ուժերը փորձել է պրոֆեսիոնալ բռնցքամարտում: Բայց ինձ ոչ թե Դավիթ Թորոսյանն է համոզել, այլ, լինելով թիմի ավագն ու արդեն բավականաչափ կայացած մարզիկ, ես եմ նրան խնդրել: Եվ բավականին հաջողություններ ունեցել եմ: Արդեն 27 տարեկան էի, իսկ սպորտում մարզիկի կյանքը շատ արագ է անցնում: Սիրողական սպորտում, բացի քո երկրի պատվից ու անձնական արժանապատվությունից, ուրիշ բան չէիր կարող ունենալ: Այդ ճանապարհը ես արդեն անցել էի եւ գնացի պրոֆեսիոնալ ռինգ: Ինձ հաջողվեց բավականաչափ գումար վաստակել: Կարծում եմ, որ վատ բան չեմ արել:
Աշոտ ՀԱԿՈԲՅԱՆ
