Վաշինգտոնի թուրքագիտության ինստիտուտի արխիվագետ Էդվարդ Էրիկսոնը փետրվարի 5-ին Ջորջթաուն համալսարանում դասախոսության ժամանակ սպառնացել է դուրս հանել Ամերիկայի Հայ Դատի հանձնախմբի կառավարության հետ կապերի հարցերով տնօրեն Քեյթ Նահապետյանին, այն բանից համար, որ նա հարցրել է, թե Հայոց ցեղասպանության հետ կապված ինչ դիրքորոշում ունի Էրիկսոնը, և ինչ կապ կա իր կազմակերպության ու Թուրքիայի կառավարության միջև: Հայտնում է «Ասպարեզ» թերթը:
«Կարո՞ղ եք նրան այստեղից դուրս հանել», – ասել է Էրկիսոնը ի պատասխան հարցի, թե արդյոք 1915թ. հայերի սպանությունները նա ցեղասպանություն է համարում:
«Սա Թուրքիան չէ», – հակադարձել է Նահապետյանը՝ ավելացնելով, որ Թուրքիայի դիրքորոշումն ունեցողները ԱՄՆ-ում չեն կարող լռեցնել ուրիշներին:
Դասախոսությանը մասնակցող հանձնախմբի մեկ այլ ներկայացուցիչ՝ գործադիր տնօրեն Արամ Համբարյանը խնդրել է պարզաբանել, թե ինչ կապ կա Թուրքագիտության ինստիտուտի և Թուրքիայի կառավարության միջև, ինչպես նաև Հայոց ցեղասպանության ժխտողական քաղաքականության:
Կարդացեք նաև
Էրիկսոնը պատասխանել է, որ ինստիտուտը հիմնվել է Թուրքիայի կառավարության օժանդակությամբ, սակայն պնդել է, որ ոչ մի պարտավորություն չունի այդ երկրի նկատմամբ. «Այն որպես առանձին մարմին է գործում, իր անձնական որոշումներն է կայացնում և գործ չունի հայկականության կամ Հայոց ցեղասպանությունը ժխտելու հետ»:
Նահապետյանը հերքել է այդ պնդումը՝ հիշեցնելով, որ ինստիտուտի նախկին տնօրեն Դոնալդ Քուաթաերթը ստիպված եղավ հետ կանգնել Հայոց ցեղասպանությունն ընդունելու իր դիրքորոշումից, երբ այն ժամանակ ԱՄՆ-ում Թուրքիայի դեսպան Նաբի Շենսոյը հասկացրեց, որ Թուրքիայի կառավարությունը կդադարի ֆինանսական աջակցություն ցուցաբերել ինստիտուտին:
Հարցուպատասխանի ժամանակ Էրիկսոնը խոստովանել է, որ ոչ կարողանում է հերքել, ոչ էլ ճանաչել Հայոց ցեղասպանության իրողությունը. «Օրեր կան, որ արթնանում ու մտածում եմ՝ հավանաբար դա ցեղասպանություն է: Օրեր էլ կան արթնանում, մտածում եմ՝ հավանաբար ցեղասպանություն չէ», – ասել է Էրիկսոնը:
Պատրաստեց Հովհաննես ԻՇԽԱՆՅԱՆԸ
