«Դեմ ենք պարտադիր կուտակային համակարգին» ակցիային այսօր միացել են նաեւ ատոմակայանի տասնյակ աշխատողներ: Ըստ նրանց, ատոմակայանում 1974 թվականից հետո ծնված 600 աշխատակից կա:
Ակցիային միացած ատոմակայանի աշխատակիցներից մեկն ասաց, որ իրենց մոտ պահումները լինելու են նվազագույնը 25.000 դրամ: «Իսկ մարդիկ, բոլորը հիմա բանկերից վարկ են վերցրել, նույնիսկ ատոմակայանի աշխատակիցները, դուք մի զարմացեք մեր բարձր աշխատավարձի վրա: Բոլորս բանկերում վարկեր ունենք, տոկոսների տակ ենք: Այդ տոկոսներին հասցրել են մեզ մեր իշխանությունները, մեր կառավարությունը: Պետք է այդ տոկոսները փակենք, բայց ի վիճակի չենք»,- ասաց ատոմակայանի աշխատակիցը:
Այսօր ակցիային էր միացել նաեւ «Ժառանգություն» կուսակցության ղեկավար Րաֆֆի Հովհաննիսյանը. «Եկել եմ զորակցելու եւ հավաստելու, որ այստեղ այն կազմակերպչական հոգին է, որը բերելու է հաղթանակ»:
Թե ինչպես է տեսնում հաղթանակի լուծումը, պարոն Հովհաննիսյանն ասաց. «Ինչպես ընտրություններն են եղել հակասահմանադրական, հակաիրավական, ինչպես հայ-թուրքական արձանագրություններն ու Մաքսային միությանն անդամակցելը եւ այս չընտրված իշխանությունների `այլ հարցերով մյուս բոլոր լուծումներն են եղել…»:
Կարդացեք նաև
Անդրադառնալով պայքարը կուսակցականացնելու, քաղաքականացնելու մասին քննադատություններին, պարոն Հովհաննիսյանն ասաց. «Մեր երկիրն այնքան վատ վիճակում է, որ էական չէ, ինչ են կոչում` քաղաքական է, թե քաղաքացիական: Որեւէ տարբերություն չկա: Ես հանդես եմ գալիս որպես ՀՀ քաղաքացի, դա չի նշանակում, որ քաղաքացիական հասարակությունը չպետք է մաս կազմի քաղաքական օրակարգի հստակեցմանը, կամ, թե քաղաքական ուժերն անհաղորդ պետք է մնան քաղաքացիների պահանջներից»:
Մանրամասները` տեսանյութում
Արփինե ՍԻՄՈՆՅԱՆ
