Երեկվանից մամուլում հակասական տեղեկություններ հայտնվեցին Գյումրու Մուշ բաժնի ոստիկանապետ Սարգիս Մարտիրոսյանի աշխատանքից ազատվելու մասին:
Ֆոտոլրագրող Գագիկ Շամշյանի տեղեկացմամբ, նա դիմում էր ներկայացրել Վլադիմիր Գասպարյանին`խնդրելով իրեն ազատել թոշակի անցնելու պատճառաբանությամբ, սակայն Սարգիս Մարտիրոսյանը հերքել էր այդ լուրերը` նշելով, որ չի պատրաստվում թոշակի գնալ:
Այսօր տեղի ոստիկանությունից Aravot.am-ին մեկ անգամ ևս հավաստիացրեցին, որ ոստիկանապետ Մարտիրոսյանը իրոք դիմում է ներկայացրել Վլադիմիր Գասպարյանին:
Մենք այս լուրերի իսկությունը փորձեցինք ճշտել ոստիկանության հասարակայնության և լրատվության վարչությունից, որտեղից, սակայն, խորհուրդ տվեցին դիմել ոստիկանապետին` Սարգիս Մարտիրոսյանին:
Կարդացեք նաև
Aravot.am-ը Սարգիս Մարտիրոսյանից նախևառաջ հետաքրքրվեց, թե քանի՞ տարեկան է ինքը, արդյո՞ք թոշակային տարիքում է: Պաշտոնյան մեզ հետ զրույցում ասաց. «Իմ 50 տարին նոր է լրացել, ես ջահել մարդ եմ, ի՞նչ թոշակային տարիք, ես գնդապետ եմ, իսկ գնդապետը կարող է մինչև 60 տարեկան աշխատել: Նման բան չկա, ես դիմում չեմ ներկայացրել, հենց այս պահին իմ աշխատավայրում եմ, ամեն ինչ նորմալ է: Ես ծնունդով Շիրակի մարզից եմ, Արթիկի շրջանի Լեռնակերտ գյուղից, մշեցու թոռ եմ` թասիբով, այնպես որ, Շիրակի մարզը ինձ շատ հոգեհարազատ է: Ես Գյումրիում ինձ օտար չեմ զգում, իմ ամբողջ հարազատությունը այստեղ է: Ես հոգով, սրտով ոստիկան եմ, 30 տարի աշխատել եմ համակարգում, գնդապետ եմ դարձել, թե իմ հարազատները, թե իմ տղան հպարտ են իմ գնդապետ լինելով, ես պարզճակատ եմ բոլորի առջև: Առանց այս աշխատանքի չեմ կարող ապրել, անգամ մտածում եմ` եթե դառնամ 60 տարեկան ու թոշակի գնամ, ինչպե՞ս եմ ապրելու առանց այս աշխատանքի: Գյումրին իմ հարազատ քաղաքն է, ես նորից եմ կրկնում, օտար մարդ չեմ, ինչո՞ւ թողնեմ գնամ»:
Մենք հետաքրքրվեցինք` այդ դեպքում ինչո՞ւ են նման լուրեր տարածվում, ովքե՞ր են տարածողները` շահագրգիռ մարդի՞կ, չարակամնե՞ր: «Ուզում են ինչ-որ բան խճճել, բայց եթե մարդ ազատ ժամանակ ունենա, այսքան ծանրաբեռնված չլինի, միգուցե և գտնի այդ լուրերը տարածողներին: Բայց ես ձեզ մի բան ասեմ, ես սովոր եմ, որ պիտի իմ մասին գրեն, երբ աշխատում էի Կենտրոնի ոստիկանությունում, անընդհատ մամուլն ինձ անդրադառնում էր, գիտեք՝ ինչ-որ տեղ բնական է, ես պաշտոնյա եմ, բա չանդրադառնա՞»,-անկեղծացավ ոստիկանապետը:
Նունե ԱՐԵՎՇԱՏՅԱՆ
