Ուկրաինայի «Բատկիվշչինա» կուսակցության առաջնորդ Արսենի Յացենյուկը պատրաստ է ստանձնել երկրի վարչապետի պաշտոնը, եթե կառավարությունը ձևավորվի ընդդիմադիր գործիչներից, և եթե երկիրը վերադառնա 2004թ. սահմանադրությանը: Հայտնում է ուկրաինական «Ինտերֆաքս»-ը:
«Մենք պատրաստ ենք մեզ վրա վերցնել երկրի համար պատասխանատվությունը: Մենք պատրաստ ենք ղեկավարել կառավարությունը, եթե կառավարական պաշտոնները ստանձնեն ընդդիմադիր գործիչները: Իմ երկրի համար այս դժվարին պահին, երբ այն տնտեսական ճգնաժամի մեջ… մենք վստահ ենք, որ ընդդիմությունը գլուխ կհանի ղեկավարման հարցում և կարող է կամուրջներ գցել երկփեղկված կողմերի միջև: Դա շատ ռիսկային է: Բայց խոսքը իմ քաղաքական ապագայի մասին չէ, այլ երկրի ապագայի: Ես պատրաստ եմ կորցնել վարկանիշս, որպեսզի փրկեմ երկիրը», – հայտնել է Յացենյուկը «Դոյչե Վելե»-ին տված հարցազրույցում:
Պատասխանելով ճշգրտող հարցին, թե արդյոք նա այդ քայլին կգնա նոր սահմանադրություն ընդունելու պայմանով, նա ասել է. «Մենք պատրաստ ենք դա անել 2004թ. սահմանադրության հիման վրա: Եթե կառավարությունը ձևավորվի խորհրդարանում, մենք երաշխիքներ կունենանք, որ այն չի նշանակվի երեք ամսվա կամ երեք շաբաթվա համար: Այս կառավարությունը պետք է իրական փոփոխություններ կատարելու հնարավորություն ստանա»:
Միաժամանակ Յացենյուկն ասել է, որ Ուկրաինայի նախագահ Վիկտոր Յանուկովիչը «պատրաստ չէ հրաժարվել անսահմանափակ իշխանությունից»:
Կարդացեք նաև
Հունվարի 25-ին Յանուկովիչը Յանցենյուկին առաջարկել էր ստանձնել վարչապետի պաշտոնը, իսկ մեկ այլ ընդդիմադիր առաջնորդ Վիտալի Կլիչկոյին՝ վարչապետի տեղակալի: Ավելի ուշ Յացենյուկը հայտնել էր, որ ընդդիմությունը ո՛չ ընդունում, ո՛չ էլ մերժում է իշխանության առաջարկը: Իսկ Կլիչկոն ասել էր, որ իրեն չի պատկերացնում կառավարությունում:
Պատրաստեց Հովհաննես ԻՇԽԱՆՅԱՆԸ
