Ազգային ժողովում այսօր լսվում էր Տնտեսական մրցակցության պաշտպանության պետական հանձնաժողովի հաշվետվությունը, որը ներկայացնում էր ՏՄՊՊՀ նախագահ Արտակ Շաբոյանը:
Մանրամասնորեն ներկայացնելով, թե քանի՞ ընկերության են տուգանել, ինչ աշխատանքներ են արվել նախորդ տարվա ընթացքում, ՏՄՊՊՀ նախագահը այդուհետեւ լսեց պատգամավորների հարցերը:
Դրանք հիմնականում չէին առնչվում հաշվետվությանը: Պատգամավորները տալիս էին մեր տնտեսությանը, սոցիալ-տնտեսական քաղաքականությանն առնչվող բազմատեսակ հարցեր՝ սկսած նրանից, թե ինչո՞ւ է Բագրատաշենի մոտ տեղադրված արագաչափը 20կմ/ժամ արագություն պարտադրում վերջացրած խոշոր սուպերմարկետների կողմից փոքր խանութները կլանելու մտահոգությամբ:
Պատգամավորներից ոմանք, այնուամենայնիվ, անդրադարձան ՏՄՊՊՀ գործունեությանը. մի մասը իր խոսքում նշեց, որ ՏՄՊՊՀ-ն շատ է նեղում տնտեսվարողներին՝ խոշոր տուգանքներով, մի քանիսն էլ ճիշտ հակառակը՝ պահանջում էին, որ ավելի մեծ եւ խիստ տուգանքներ կիրառվեն:
Կարդացեք նաև
Պահանջները ՏՄՊՊՀ-ից այնքան շատ էին, որ ի վերջո Շաբոյանը տեղի տվեց եւ հանդարտ ու մեղմ տոնը մի փոքր փոխելով նյարդայնացած հիշեցրեց պատգամավորներին, որ իր ղեկավարած հանձնաժողովի ռեսուրսները՝ մարդկային եւ ֆինանսական շատ փոքր են, եւ ուղղակի ֆիզիկապես հնարավոր չէ ընդգրկել հանձնաժողովի գործունեության տիրույթում այն բոլոր հարցերը, որ պատգամավորները բարձրացնում են:
Մելանյա ԲԱՐՍԵՂՅԱՆ
